Inemen emdelemin dep ókpesi tesildi: ShQO dárigerleri zeınetkerge shuǵyl ota jasady

ÓSKEMEN. KAZINFORM — Shyǵys Qazaqstan oblysynda dástúrli emes shyǵys medıtsınasymen emdelgen 72 jastaǵy zeınetkerdiń ókpesi tesilip, shuǵyl ota jasaldy. Oqıǵa Vydrıha aýylynda ornalasqan «Ýba» sanatorııinde bolǵan.

Zardap shekken áıeldiń qyzynyń aıtýynsha, akýpýnktýra seansy kezinde anasy kenetten qatty aýyrsynýdy sezingen. Alaıda protsedýra júrgizgen dáriger bul jaǵdaıdy asqyný dep baǵalamaı, naýqasty jibere salǵan.

— Anam birden denesi aýyrsynǵanyn aıtty, biraq oǵan eshkim mán bermedi. Protsedýradan keıin ony jaı bólmesine jiberdi, — deıdi qyzy.

Kelesi kúni áıeldiń jaǵdaıy kúrt nasharlaǵan. Sanatorıı qyzmetkerleri jedel járdem shaqyrǵan. Alaıda qyzynyń sózinshe, medıtsına qyzmetkerlerine naýqastyń bir kún buryn ınemen emdelgeni týraly habarlanbaǵan. 

Óskemenge oralǵan soń áıel qaıtadan jedel járdem shaqyrǵan. Rentgenologııalyq tekserý barysynda naýqastyń ókpesi tesilip, pnevmotoraks paıda bolǵany anyqtalǵan.

Zeınetker shuǵyl túrde aýrýhanaǵa jatqyzylyp, dárigerler plevralyq pýnktsııa jasap, ókpeden shamamen 1,5 lıtr aýa shyǵarǵan. Osylaısha, onyń jaǵdaıy turaqtalyp qaldy.

Oqıǵadan keıin áıel akýpýnktýra jasaǵan dárigerge qatysty polıtsııaǵa aryz jazǵan. Qazir bolǵan jaǵdaıdyń barlyq mán-jaıy anyqtalyp, medıtsına qyzmetkeriniń áreketterine quqyqtyq baǵa berilip jatyr.

Eske salsaq, buǵan deıin Shyǵys Qazaqstanda 150-ge jýyq dáriger jetispeıtindigi habarlanǵan.