Inemen emdelemin dep ókpesi tesildi: ShQO-da shıpajaıǵa qatysty tekserý bastaldy

ÓSKEMEN. KAZINFORM — Shyǵys Qazaqstan oblysynda dástúrli emes shyǵys medıtsınasymen emdelgen 72 jastaǵy zeınetkerdiń ókpesi tesilýine baılanysty shıpajaıǵa qatysty tekserý bastaldy. 

Oqıǵa Vydrıha aýylynda ornalasqan «Ýba» sanatorııinde bolǵan. Zardap shekken áıeldiń qyzynyń aıtýynsha, akýpýnktýra seansy kezinde anasy kenetten qatty aýyrsynýdy sezingen. Alaıda protsedýra júrgizgen dáriger bul jaǵdaıdy asqyný dep baǵalamaı, naýqasty jibere salǵan.

Rentgenologııalyq tekserý barysynda naýqastyń ókpesi tesilip, pnevmotoraks paıda bolǵany anyqtalǵan. Zeınetker shuǵyl túrde aýrýhanaǵa jatqyzylyp, dárigerler plevralyq pýnktsııa jasap, ókpeden shamamen 1,5 lıtr aýa shyǵarǵan.

Jaǵdaıǵa baılanysty ShQO jumyspen qamtý jáne áleýmettik baǵdarlamalardy úılestirý basqarmasynan túsinikteme berdi.

— «Ýba» shıpajaıynda fızıoterapııa, massaj, parafınmen emdeý, ıngalıatsııa, galvanıkalyq vanna, fıtoterapııa, tsırkýlıarly dýsh, parafıtobóshke, balshyqpen emdeý, emdik dene shynyqtyrý, galoterapııa, shýngıtoterapııa jáne tuzdy vannalar qyzmetteri kórsetiledi. Al ınemen emdeý shıpajaı usynatyn kepildendirilgen qyzmetter tizbesine kirmeıdi. Bolǵan jaǵdaıǵa baılanysty basqarma tarapynan qyzmettik tekserý júrgizý úshin arnaıy jumys toby quryldy. Tekserý qorytyndysy boıynsha kináli adamdar tıisti jaýapkershilikke tartylady. Sonymen qatar aýdandyq polıtsııa bólimi tarapynan da protsessýaldyq is-sharalar júrgizilip jatyr, — delingen habarlamada.

Eske salsaq, osyǵan deıin Shyǵys Qazaqstan oblysynda dástúrli emes shyǵys medıtsınasymen emdelgen 72 jastaǵy zeınetkerdiń ókpesi tesilgeni habarlanǵan.