Ine-jip, qaıshy, shahmat - Poıyz jolaýshylaryna qandaı qyzmetter kórsetilýi tıis
Onyń aıtýynsha, medıaortalyq byltyrdan beri jolaýshylardy temir jolda tasymaldaý qyzmetiniń sapasyn tekserip keledi.
«Kólik komıtetiniń derekterine sáıkes, elimizde oblysaralyq jolaýshylardyń temir jol tasymaly 57 baǵyt boıynsha júrgiziledi. Ony júzege asyratyn 9 tasymaldaýshynyń 8-i - jeke kompanııalar (qamtý úlesi 34%) bolsa, bireýi - «Jolaýshylar tasymaly» AQ (qamtý úlesi 66%) ulttyq tasymaldaýshysy bar. Ótken jyl komıtetpen birlesip, 101 poıyzdy tekserip, 800-den astam kemshilik tapqan edik. Ásirese, eskirgen, kirlegen tósek-oryndar kóp kezdesti. Nátıjesinde tasymaldaýshylar 55 mln teńge aıyppul tólep, barlyq kemshilik túzetildi», - dedi Tólegen Baıǵulov elordada Sybaılas jemqorlyqqa qarsy Ulttyq bıýroda ótken baspasóz máslıhatynda.
Sonymen birge, medıaortalyq basshysy jolaýshylardyń óz quqyqtaryn jete bilmeıtinin, túsindirme jumystaryn kóptep uıymdastyrý qajettigin atap ótti.
«Eń aldymen, jolaýshylar artyq oryn almaıtyn 7 jasqa deıingi balany tegin alyp júrýge quqyly. 7-15 jas aralyǵyndaǵy balalar úshin bılet qunynyń jartysy tólenedi. Bir eresek jáne bir balalar bıleti úshin 35 kelige deıin qol júgin alyp júrýge bolady. Poıyz júrýine 24 saǵattan artyq ýaqyt bolsa, bılet qunyn tolyq qaıtaryp alýǵa bolady. 6 saǵat ýaqyt qalsa, bılet baǵasynyń 50% qaıtarylady», - dedi ol.
Jolserikterdiń uıaly telefondy qosymsha aqyǵa qýattaýy da zańsyz. Vagon tıpi men poıyz sanatyna qaramastan, jolaýshylar kýpe ishinde telefondy tegin qýattaýǵa quqyly.
«Jol júrý bıletin kórsetý arqyly vokzal ishindegi dárethanaǵa da tegin kirýge bolady. Jáne barlyq poıyzdyń dárethanalarynda sabyn men qaǵaz bolýy mindetti. Dárethanany jolserik tórt saǵat saıyn tazalap turýy tıis. Sondaı-aq, jolserik kelýshilerge tegin sháı, stakan, qasyq, ıne-jip, qaıshy, dári-dármek, tipti shahmat, doıby sekildi ústel oıyndaryn da ákelip berýi kerek», - deıdi T. Baıǵulov.
Sonymen birge, jolserik qarttarǵa, múgedekterge, júkti jáne balaly áıelderge tósek salyp berýi tıis. Qajet bolsa, ústińgi qabatqa qaýipsizdik belbeýin ornatady.
«Poıyzdyń toqtaýyna jarty saǵat qalǵanda tósek-oryndy ótkizýdi talap etetin jolserikter bar. Zań júzinde jolserik bul zattardy jolaýshylar shyǵyp ketken soń, ózi jınap, kir jýatyn jerge tapsyrýy tıis. Tósek-oryndy jarty saǵat buryn jınaý tek shuǵyl jaǵdaıda ǵana jolaýshynyń ruqsatymen júrgizilýi kerek. Al jol ústinde tósek-oryndy qaıta aýystyrý úshin qosymsha aqy tólenýi qajet. Jolserik usynatyn kofe, kondıterlik taǵamdar da bólek aqyǵa beriledi. Bul - zańdy», - dep túsindirdi spıker.
Medıaortalyq basshysy jolaýshylar quqyǵy buzylǵan oqıǵalar jóninde foto, vıdeo, aýdıo materıaldardy +7 702 000 2494 WhatsApp nómirine joldaýdy surady.