Indýstrııanyń bolashaǵy: XVI Halyqaralyq Astana Mining & Metallurgy 2026 kongresi bastaldy
ASTANA. KAZINFORM — Astanada Astana Mining & Metallurgy — AMM 2026 XVI Halyqaralyq taý-ken metallýrgııalyq kesheni (TMK) kongresi óz jumysyn bastady. Bıyl is-sharanyń bas seriktesi retinde Qarmet kompanııasy qatysyp jatyr.
Kongress jyl saıyn TMK kásiporyndarynyń ókilderin, memlekettik organdardy, halyqaralyq uıymdardy, ınvestıtsııalyq qaýymdastyqty jáne tehnologııalyq sheshimder jetkizýshilerin biriktiredi. Bul alań saladaǵy negizgi syn-qaterlerdi talqylaýǵa, tájirıbe almasýǵa jáne TMK-ny odan ári damytýdyń perspektıvalyq baǵyttaryn aıqyndaýǵa múmkindik beredi.
Іs-sharaǵa Qazaqstan Respýblıkasynyń Premer-mınıstri Oljas Bektenov qatysty. Oǵan Qarmet kompanııasynyń negizgi óndiristik kórsetkishteri tanystyrylyp, iske asyrylý satysyndaǵy birqatar ınvestıtsııalyq jobalar usynyldy.
Birinshi kúnniń basty oqıǵasy «Jer qoınaýynan zııatkerlik bıikterge: TMK bolashaǵy úshin jahandyq seriktestik» taqyrybyndaǵy plenarlyq otyrys ótti. Suraq-jaýap formatyndaǵy talqylaýǵa Qarmet kompanııasynyń qarjy jáne strategııalyq damý jónindegi basqarma tóraǵasynyń birinshi orynbasary Zaýre Zaýrbekova qatysty.
Qatysýshylar tehnologııalyq damý, halyqaralyq yntymaqtastyq jáne zamanaýı basqarý tásilderiniń TMK salasynyń básekege qabilettiligin arttyrýdaǵy rólin talqylady.
— Búginde Qarmet aýqymdy transformatsııa kezeńinen ótýde. Biz shamamen 3,5 mlrd dollar kólemindegi ınvestıtsııalyq baǵdarlamany iske asyryp jatyrmyz. Bul bizge Eýropa, Qytaı jáne basqa da elderden jańa tehnologııalardy engizýge, álemdik bolat naryǵyndaǵy ónimderimizdiń básekege qabilettiligin arttyrýǵa múmkindik beredi. Sonymen qatar jańa tehnologııalar óndiristi tıimdi ári ekologııalyq turǵydan taza etýge kómektesedi. Qazaqstan tabıǵı resýrstarǵa baı. Alaıda joǵary qosylǵan quny bar ónim óndirýge kóshý úshin jańa tásilder qajet. Bul jerde negizgi róldi adamdar, olardyń bilimi, biliktiligi jáne kásibı damýy atqarady, — dep atap ótti Zaýre Zaýrbekova.
Plenarlyq otyrys barysynda TMK damýynyń perspektıvalary, jasandy ıntellektti engizý jáne logıstıka salasyndaǵy yntymaqtastyq máseleleri de qarastyryldy.
— Búgin taý-ken metallýrgııa salasy úshin joǵary tehnologııalardyń mańyzdyly kóp aıtyldy. Meniń oıymsha, Qazaqstannyń artyqshylyqtarynyń biri — zamanaýı tehnologııalardy engizip, neǵurlym tıimdi bıznes-modelder qurý múmkindigi. Biz sapaly ónim óndiremiz, óndiristik protsesterdi jetildiremiz jáne eńbek qaýipsizdigi men ónerkásiptik qaýipsizdik máselelerine erekshe kóńil bólemiz. Kásiporyn jańa aktsıonerge ótkennen keıin qaýipsizdik absolıýtti basymdyqqa aınaldy. Qyzmetkerlerdiń ómiri men densaýlyǵyn qorǵaýǵa baǵyttalǵan kóptegen jobalar júzege asyrylýda. Buǵan qosa, tsıfrlyq tehnologııalar men jasandy ıntellekt bizge belsendi túrde kómektesip keledi, olar shahtalarda da, metallýrgııalyq óndiriste de keńinen qoldanyla bastady. Bul bıznesti neǵurlym tıimdi etetin jańa tásil, — dep atap ótti Zaýre Zaýrbekova.
Sondaı-aq salanyń turaqty damýyna negiz bolatyn sheshimderdi búginnen bastap qabyldaýdyń mańyzdylyǵyna erekshe nazar aýdaryldy. Áńgime jańa tehnologııalar, uzaq merzimdi seriktestik jáne óndiristi basqarýdyń zamanaýı tásilderi týraly.
— Eń aldymen turaqty ınvestıtsııalyq orta qajet. Meniń oıymsha, Qazaqstan úkimeti bul baǵytta úlken jumys atqaryp jatyr. Eldiń zańnamasy damyp keledi, sondyqtan ınvestorlar Qazaqstannyń ınvestıtsııalyq klımatynyń tartymdylyǵyna senimdi bola alady. Bul normatıvtik bazaǵa, ekologııalyq retteýge jáne basqa da kóptegen aspektilerge qatysty. Budan bólek, sala úshin uzaq merzimdi qarjylandyrý óte mańyzdy. Taý-ken ónerkásibi birden nátıje bermeıdi. Munda bolashaqqa baǵyttalǵan, shydamdy ınvestorlar qajet. Dál osy tásil aýqymdy damý jobalaryn júzege asyrýǵa múmkindik beredi, – dep túıindedi Zaýre Zaýrbekova.
Іskerlik baǵdarlama aıasynda seriktes elder úkimetteri ókilderiniń qatysýymen strategııalyq dıalog ótti. Onda halyqaralyq yntymaqtastyq perspektıvalary, ınvestıtsııalyq baılanystardy damytý jáne TMK salasyndaǵy birlesken jobalardy iske asyrý máseleleri qaraldy.
Jekelegen sessııalar ınvestıtsııalyq ahýal men retteýshi ortaǵa, joǵary qubylmalylyq jaǵdaıyndaǵy metall saýdasyna, táýekelderdi basqarýǵa, geologııalyq barlaýǵa, kólik ınfraqurylymyna jáne Ortalyq Azııany jahandyq logıstıkalyq tizbekterge ıntegratsııalaýǵa arnaldy.
Qarmet kompanııasynyń AMM 2026 kongresine bas seriktes retinde qatysýy onyń salalyq dıalogty damytýǵa úles qosýǵa, seriktestermen yntymaqtastyqty nyǵaıtýǵa jáne Qazaqstannyń TMK salasyna zamanaýı tehnologııalardy engizýdi qoldaýǵa degen umtylysyn kórsetedi.
