Indýstrııalyq sertıfıkat: «Atameken» UKP múgedekter uıymdaryna birneshe usynys bildirdi

NUR-SULTAN. QazAqparat – Elordada «Atameken» ulttyq kásipkerler palatasynyń basqarma tóraǵasy Abylaı Myrzahmetov elordada múmkindigi shekteýli jandardyń qatysýymen múgedekter uıymyna ındýstrııalyq sertıfıkatty qaıtarý múmkindigin talqylap jatyr, dep habarlaıdy QazAqparat tilshisi.

«Múgedekter uıymyn barynsha qoldaý maqsatynda ındýstrııalyq sertıfıkat berý úshin mynadaı usynystardy ortaǵa salamyz: birinshiden, múgedekter uıymdarynyń biryńǵaı reestrin júrgizip otyratyn uıymdy belgileý kerek. Bul uıym – memlekettik organ da bolýy múmkin. Ekinshiden, atalmysh reestrge uıymdardy engizý úshin naqty talaptardy ázirlegen jón. Úshinshiden, salalyq talaptardy daıyndap, qazirgi qoldanystaǵy talaptardyń bárin jetildirgen abzal. Tórtinshiden, ındýstrııalyq sertıfıkat berý tártibine ózgeris engizip, bul baǵytta ár óńirde kem degende bir sarapshy bekitý kerek», - dedi «Atameken» UKP memlekettik satyp alý departamentiniń dırektory Merýert Ábdýálı.

«Atameken» UKP memlekettik satyp alý departamentiniń dırektory múgedekter uıymy atalǵan usynystarmen kelisken jaǵdaıda osy usynystardy iske asyrýdy bastap ketýge bolatynyn jetkizdi. Ázirge múgedekter uıymdarynyń ókilderi men «Atameken» UKP músheleri bul máseleni talqylap jatyr.

Aıta ketsek, buǵan deıin «Atameken» ulttyq kásipkerler palatasy ındýstrııalyq sertıfıkat berýdiń múgedekter uıymyna nelikten toqtatylǵanyn túsindirgen bolatyn.

«Múgedekter uıymynyń biryńǵaı memlekettik reestri joq. Olardy biriktiretin qaýymdastyq ta qurylmaǵan. Osyǵan baılanysty shekteıtin normalarǵa jol bermeý úshin «Atameken» UKP ındýstrııalyq sertıfıkatty berý boıynsha qoldanystaǵy erejege ózgeristerdi engizdi. Bul rette tıisti talaptar ázirlengenshe múgedekter uıymy ındýstrııalyq sertıfıkat beriletin uıymdardyń qatarynan shyǵarylady», - dep habarlady «Atamekennen».