Indýstrııalyq-ınnovatsııalyq qyzmetti memlekettik qoldaýǵa arnalǵan zań qabyldandy - Senat

ASTANA. 21 jeltoqsan. QazAqparat /Qanat Mámetqazyuly/ - Búgin QR Parlamenti Senatynyń jalpy otyrysynda depýtattar «Qazaqstan Respýblıkasynyń keıbir zańnamalyq aktilerine ındýstrııalyq-ınnovatsııalyq qyzmetti memlekettik qoldaý máseleleri boıynsha ózgerister men tolyqtyrýlar engizý týraly» zań jobasyn ekinshi oqylymda talqylap, qujatty qabyldady.

Endi zań Memleket basshysynyń qol qoıýyna jiberiledi.

Atalǵan qujat «Indýstrııalyq-ınnovatsııalyq qyzmetti memlekettik qoldaý týraly» zańǵa ilespe qujat retinde qarastyrylyp otyr. Osyǵan oraı zań jobasynyń negizgi maqsaty qoldanystaǵy zańnama normalaryn osy zańǵa sáıkestendirý bolyp tabylady jáne sol baǵytta birqatar zańnamalarǵa ózgertýler engiziledi. Atap aıtqanda, Jer kodeksine ındýstrııalyq-ınnovatsııalyq jobalardy iske asyrý úshin ýaqytsha jer paıdalaný quqyǵynda jer ýchaskelerin bólý múmkindigin berý bóliginde, Salyq kodeksine ǵylymı-zertteý, ǵylymı-tehnıkalyq jáne tájirıbelik-konstrýktorlyq dep tanylǵan jumystardyń nátıjesi Qazaqstan aýmaǵynda alǵash ret engizilgen jaǵdaıda, atalǵan jumystardy oryndaýǵa jumsalǵan shyǵystarǵa salyq salýdy azaıtý sharalary kózdeledi. Budan bólek, ındýstrııalyq-ınnovatsııalyq qyzmet sýbektilerinen ónimdi kepildi túrde satyp alý sheńberinde satyp alýdy júzege asyrý qarastyrylady.

Bul rette Senat qabyldaǵan zań ındýstrııalyq-ınnovatsııalyq qyzmetti memlekettik qoldaýdy iske asyrý boıynsha zańnamany ýaqtyly retteýdi qamtamasyz etýge múmkindik beredi. Sondaı-aq ekonomıkanyń basym salalarynyń jumys isteýin jáne pármendi damýyn jetildirýge, uzaq merzimdi perspektıvada ulttyq ekonomıkanyń ornyqty ósýi men onyń básekege qabilettiligin arttyrýǵa yqpal etetin bolady.

Esterińizge sala keteıik, ekinshi oqylym barysynda depýtattar qujatqa birqatar ózgerister engizgen bolatyn. Atap aıtqanda, QR Úkimeti ınvestıtsııalyq kelisimshart jasalǵan kezden bastap jeti jyl merzimge bekitetin ınvestıtsııalyq kelisimshart jasasqan kompanııalardy jer jáne múliktik salyqtan bosatý týraly norma qamtyldy. Budan bólek, memlekettiń qatysý úlesi 25 paıyzdan asatyn venchýrlik qorlar tóleıtin dıvıdendterdi salyq salýdan, tehnoparkterdi jer jáne múlik salyǵynan bosatý kózdeledi.

Sondaı-aq, memlekettiń altyn-valıýta aktıvterin tolyqtyrý úshin tazartylǵan quıma altyndy satyp alýdyń basym quqyǵyn engizýine jáne QR Ulttyq banki ýákiletti organ dep aıqyndalýyna baılanysty Qazaqstan Respýblıkasy rezıdentteriniń tazartylǵan baǵaly metaldardy, altyndy jáne platınany QR Ulttyq bankine ótkizýi kezinde olardy salyq salýdan bosatý bóliginde túzetýler engizý usynylǵan.