Indýstrııalyq aımaqty kez kelgen adam asha alady - Erlan Qaıyrov
ASTANA. QazAqparat - QR Investıtsııalar jáne damý vıtse-mınıstri Erlan Qaıyrov arnaıy ekonomıkalyq jáne ındýstrııalyq aımaqtardyń aıyrmashylyǵyn aıtyp berdi, dep habarlaıdy QazAqparat tilshisi.
«Indýstrııalyq aımaqtardyń negizgi maqsaty - jergilikti jerde kásipkerlikti damytý. Al arnaıy ekonomıkalyq aımaqtardyń ózgesheligi nede? Ol jerde biz arnaıy salyqtyq jáne kedendik sharttardy jasaımyz. Indýstrııaldyq aımaqtarda ondaı jeńildikter joq», - deıdi E.Qaıyrov.
Onyń aıtýynsha, búgingi zańnama boıynsha kez kelgen adam óziniń jeke ındýstrııalyq aımaǵyn asha alady. «Máselen, bireýdiń ıeliginde jer, qajetti ınfraqurylym, bálkim, eski óndiristik nysan bolsa, ol jerdi ındýstrııalyq aımaq retinde ashýǵa múmkindik bar. Jerdi ýchaskege bólip, jalǵa berýge bolady. Ondaı mysaldar bar. Almatyda «Damý» atty jeke menshik ındýstrııalyq aımaq tabysty jumys istep keledi. Bylaısha aıtqanda, siz kásipkerlerdiń óz jobalaryna jer izdep júrgenin kórseńiz, ózińizge tıesili jerdi ındýstrııalyq aımaq retinde tirkep, bıznesmenderge jalǵa berseńiz bolady. Ol jaǵynan eshqandaı problema joq», - dep atap kórsetti vıtse-mınıstr.
Aıta keteıik, arnaıy ekonomıkalyq jáne ındýstrııalyq aımaqtarda jerdi berý sharalaryn barynsha ońtaılandyrý josparlanǵan. Osyǵan oraı, QR Investıtsııalar jáne damý vıtse-mınıstri Erlan Qaıyrov Parlament Májilisiniń depýtattaryna arnaıy zań jobasyn tanystyrdy. Al depýtat Baqtııar Máken «Alataý» parkiniń máselesin taǵy kóterdi.
