Indýstrııalyq aımaqtarda 200-den astam jańa joba iske asyrylmaq
ASTANA. KAZINFORM — Oljas Bektenov arnaıy ekonomıkalyq jáne ındýstrııalyq aımaqtar ınfraqurylymyn damytý máselesi boıynsha keńes ótkizdi. Bul týraly Úkimettiń baspasóz qyzmeti habarlady.
Premer-mınıstr Oljas Bektenov Prezıdent Qasym-Jomart Toqaevtyń elimizdiń ónerkásiptik áleýetin arttyrý jónindegi tapsyrmasyn oryndaý aıasynda arnaıy ekonomıkalyq jáne ındýstrııalyq aımaqtar ınfraqurylymyn damytý máselesi boıynsha keńes ótkizdi. Jıynǵa qarjy, ónerkásip jáne qurylys mınıstrleri, «Báıterek» holdıngi men Ónerkásipti damytý qorynyń basshylyǵy qatysty.
Ónerkásip jáne qurylys mınıstrliginiń derekteri boıynsha Qazaqstanda 17 arnaıy ekonomıkalyq jáne 66 ındýstrııalyq aımaq jumys isteıdi, onda jeke ınvestıtsııa kólemi 5,7 trln teńgeden asatyn jáne 57,2 myńnan astam jumys ornyn ashýǵa múmkindik beretin 860 joba júzege asyryldy.
Ónerkásip alańdarynyń ınvestıtsııalyq tartymdylyǵyn aıqyndaý kezinde ınfraqurylymnyń daıyndyǵy mańyzdy másele bolyp otyrǵany atap ótildi. Osyǵan baılanysty qosymsha ınfraqurylymnyń, onyń ishinde qosalqy stansalar men kólik jelileriniń qurylysy belsendi túrde júzege asyp jatyr.
Úkimet respýblıkalyq bıýdjetke túsetin júktemeni azaıtý úshin halyqaralyq qarjy uıymdarymen yntymaqtastyqty qosa alǵanda, bıýdjetten tys qarajat tartý boıynsha sharalar qabyldanyp jatyr.
2030 jylǵa deıin ınfraqurylymmen qamtamasyz etý arqyly AEA jáne IA aýmaqtarynda shamamen 200-den astam jańa jobany júzege asyrý josparlanyp otyr, bul jańa jumys oryndaryn qurýǵa jáne óńdeý ónerkásibiniń ósýin qamtamasyz etýge múmkindik beredi. Sondaı-aq, óńdeý ónerkásibinde 2025-2029 jyldar aralyǵynda 140 joba paıdalanýǵa berilmek.
Tutastaı alǵanda, osy jobalardy júzege asyrý óńdeý salasynyń jalpy qosylǵan qunyn ulǵaıtý arqyly Qazaqstan ekonomıkasyna úles qospaq.
Premer-mınıstr Ulttyq ekonomıka, Ónerkásip jáne qurylys, Qarjy mınıstrlikterine 2026 jylǵy 15 qańtarǵa deıin «Báıterek» holdıngine qarjylandyrý kózderi boıynsha túpkilikti sheshimdi berýdi jáne AEA men IA-ǵa qajetti ınfraqurylymdy júrgizý jobalaryn júzege asyrýǵa dereý kirisýdi tapsyrdy.
Aıta ketelik Oljas Bektenov aldaǵy merekede ishki ister organdaryna qoǵamdyq tártipti qorǵaýdy tapsyrǵan edi.