Indýstrııalyq alańdardy basqarýdyń jańa tetikteri ázirlenedi — Naǵaspaev

ASTANA. KAZINFORM — Bıyl otandyq óndirýshilermen jasalǵan kelisimsharttardyń jalpy sommasy ótken jylmen salystyrǵanda 1,5 esege ósti. Bul týraly Úkimet otyrysynda Ónerkásip jáne qurylys mınıstri Ersaıyn Naǵaspaev aıtty.

— Búginde elimizdiń barlyq aımaǵynda ınfraqurylymmen jáne ındýstrııalyq alańdarmen qamtamasyz etý boıynsha júıeli saıasat júrgizilýde. Elimizde 16 arnaıy ekonomıkalyq aımaq bar. Olarǵa 10,4 trln teńge ınvestıtsııa tartylǵan. 66 ındýstrııalyq aımaq qyzmet atqarady. Bul aımaqtarda jalpy quny 1,6 trıllıon teńge bolatyn 305 joba iske qosyldy. Sonymen qatar, shaǵyn jáne orta bıznesti qoldaý maqsatynda Shaǵyn ónerkásiptik aımaqtar qurylýda. Búgingi tańda 25 shaǵyn aımaqta 44 shaǵyn kásiporyn jumys isteıdi, — dedi ol.

Onyń aıtýynsha, aldaǵy ýaqytta ındýstrııalyq alańdardy basqarýdyń jańa tetikteri ázirlenip, ınfraqurylymdy ártúrli qarjylandyrý kózderi arqyly qamtamasyz etý josparlanyp otyr. Sonymen qatar jyl saıyn retteletin satyp alý júıesinde otandyq óndirýshilerge basymdyq berý joldary jetildirilip jatyr. 

— Mysaly, memlekettik satyp alýda esepke alynatyn otandyq ónimder tizimi keńeıtilip, 485 ónimdi qurap otyr. Sonyń arqasynda otandyq óndirýshilermen jasalǵan kelisimsharttardyń jalpy sommasy ótken jylmen salystyrǵanda 1,5 esege ósti. «Samuryq-Qazyna» qorynyń satyp alýlarynda kelisimshart jasaý tetikteri kúsheıtildi. Nátıjesinde, 10 aıda Qor kompanııalary otandyq óndirýshilermen 1,3 trln teńgege uzaq merzimdi shart pen offteık-kelisimsharttar jasady. Bul ótken jylmen salystyrǵanda 2,3 esege artyq, — dedi Ersaıyn Naǵyspaev.

Sonymen qatar ol bıyl jer qoınaýyn paıdalanýshylardyń satyp alý tetikterine de birqatar túzetý engizilgenin aıtty.

— Bıyl 1 shildeden bastap bırjay arqyly standarttalmaǵan taýarlardy satyp alý toqtatyldy. Osyǵan baılanysty satyp alý platformasy — Tizilim jańǵyrtyldy. Qabyldanǵan sharalardyń nátıjesinde, 10 aıda 1 trln teńgege uzaq merzimdi shart pen offteık-kelisimsharttar jasaldy. Bul ótken jylmen salystyrǵanda 7,7 esege artyp otyr, — dedi mınıstr.

Aıta keteıik, Úkimet otyrysynda óńdeý ónerkásibin damytý jáne tsıfrlandyrý máselesi qaralyp jatyr.