Indýstrııaldy-ınnovatsııalyq damýdyń jańa tujyrymdamasy ázirlenedi

ASTANA. QazAqparat  -  Jyl sońyna deıin  «2020-2024 jyldarǵa arnalǵan Qazaqstan Respýblıkasynyń ındýstrııaldy-ınnovatsııalyq damý tujyrymdamasy ázirlenedi. Bul týraly búgin Úkimettiń selektorlyq rejimdegi otyrysynda QR Investıtsııalar jáne damý mınıstri Jeńis Qasymbek aıtty, dep habarlaıdy QazAqparat.

«Ónerkásipke Indýstrııa 4.0 elementterin engizý úshin tehnologııalardyń eksporty men transfertine erekshe nazar aýdarylady. Otandyq kásiporyndardy tsıfrlandyrý men jańǵyrtý boıynsha jańa quraldardy jetildirip, ázirleý kerek. Tsıfrlandyrýdyń neǵurlym maqsatty túrde alǵa jyljýyna qoldaý kórsetýdiń keıbir sharalaryn ishinara qaıta qaraýdy josparlap otyrmyz»,-  dedi mınıstr.

Onyń aıtýynsha, jyl sońyna deıin tsıfrlyq tehnologııalardyń múmkindikterin kórsetetin alańǵa aınalatyn birqatar ónerkásiptik kásiporyndardy tsıfrlandyrýdyń ilki jobasyn iske qosý kózdelgen. Búgingi kúni Fraýngofer ınstıtýty sarapshylarynyń usynystaryna sáıkes kásiporyndar iriktelip alyndy. Olar myna kásiporyndar: «Kentaý transformator zaýyty» AQ, «Karlskrona» JShS, «Hımfarm» AQ, «Evrazıan fýds» AQ, «Almaty ventılıator zaýyty» JShS, «Qazaqmys» Korporatsııasy» JShS, «Qazhrom».

«Sonymen qatar, taý-ken metallýrgııalyq kesheniniń júıequrýshy kásiporyndarynda Indýstrııa 4.0 tehnologııalaryn engizý jobalaryn júzege asyratyn bolamyz. Qazirgi ýaqytta Memleket basshysynyń 2018 jylǵy 10 qańtardaǵy Qazaqstan halqyna Joldaýynda bergen tapsyrmalaryn iske asyrý maqsatynda «2020-2024 jyldarǵa arnalǵan Qazaqstan Respýblıkasynyń ındýstrııaldyq-ınnovatsııalyq damý tujyrymdamasyn ázirleý jumysyn bastadyq», - dedi mınıstr.

Jeńis Qasymbektiń  sózine qaraǵanda, atalǵan tujyrymdamada ınnovatsııalar men ozyq tehnologııalar transfertin damytýǵa, ónerkásipti tsıfrlandyrý men standarttaý júıesin durys beıimdeýge aıryqsha nazar aýdarylatyn bolady.

«Bul jumystardy 2018 jyldyń sońyna deıin aıaqtaımyz», - dedi ol.