Indýstrııalandyrýdyń úshinshi besjyldyǵy tujyrymdamasy ázirlenedi - Jeńis Qasymbek

ASTANA. QazAqparat - Indýstrııalandyrýdyń úshinshi besjyldyǵy tujyrymdamasy  ázirlenedi. Bul týraly búgin Úkimet otyrysynda QR Investıtsııalar jáne damý mınıstri Jeńis Qasymbek aıtty, dep habarlaıdy QazAqparat.

Mınıstrdiń aıtýynsha, ónerkásiptik damýdyń kelesi kezeńi - Indýstrııa 4.0 elementterin engizý arqyly tehnologııalyq damýdyń jańa sapaly deńgeıine ótý. Ótken jyly «Tsıfrly Qazaqstan» memlekettik baǵdarlamasyna engizilgen tsıfrlyq tehnologııalardy engizý úshin ekojúıe qurýǵa baǵyttalǵan negizgi ónerkásip salalaryn tehnıkalyq qaıta jaraqtandyrý sharalary ázirlendi. Aǵymdaǵy jyly 7 modeldik tsıfrlyq fabrıkamen jumys bastalady. Buǵan qosa, 14 kásiporynda Indýstrııa 4,0 tehnologııalaryn engizý jobalary qolǵa alynady. Onyń úsheýi aǵymdaǵy jyly aıaqtalýy tıis.

«Sondaı-aq, bıyl tsıfrlandyrýdy yntalandyrýǵa qatysty keıbir qoldaý sharalaryn ishinara qaıta qaraýdy josparlap otyrmyz. Innovatsııalyq quramdas jáne ónerkásipti tsıfrlandyrý boıynsha jańa jahandyq tehnologııalyq úrdisterdi eskere otyryp, jyl aıaǵyna deıin «tsıfrlyq dáýir» ónerkásibiniń qalyptasýyna baǵyttalǵan Indýstrııalandyrýdyń úshinshi besjyldyǵy tujyrymdamasy  ázirlenedi», - dedi mınıstr.

Jalpy, Jeńis Qasymbektiń sózine qaraǵanda josparlanǵan is-sharalardy iske asyrý 2018 jyly óńdelgen eksporttyń qundyq ósimin 10,3, óńdeý ónerkásibiniń eńbek ónimdiligin 6 paıyzǵa, óńdeý ónerkásibiniń negizgi kapıtalynyń 1 trln teńgege deıin ósýin qamtamasyz etýge múmkindik beredi.


Foto: primeminister.kz