Indýstrııalandyrýdyń ekinshi besjyldyǵynda 21 myń qazaqstandyq jumysqa ornalasty
ASTANA. QazAqparat - 2017 jyldyń jeti aıynyń qorytyndysy boıynsha, óńdeý sektorynyń kásiporyndarynda óndiristiń naqty ósimi 6,3 paıyzdy qurady. Bul týraly memlekettik baǵdarlamanyń iske asyrylý barysyna arnalǵan Úkimet úıindegi baspasóz máslıhatynda QR Investıtsııalar jáne damý birinshi vıtse-mınıstri Alık Aıdarbaev málimdedi, dep habarlaıdy QazAqparat.
«2017 jyldyń alǵashqy toqsanynyń qorytyndysy boıynsha, óńdeý ónerkásibindegi eńbek ónimdiligi 11,8 myń AQSh dollaryn qurap, 5,3%-ǵa artty. 2017 jyldyń qańtar-mamyrynda óńdeý ónerkásibindegi eksport kólemi 2016 jyldyń sáıkes kezeńimen salystyrǵanda 27,8%-ǵa artyp, 6,2 mlrd AQSh dollaryn qurady. Bul álemdik naryqtaǵy baǵa konıýnktýrasynyń qolaılylyǵyna, ónimdi ótkizý naryǵynyń keńeıýi men jetkizý ósimine baılanysty iske asyrylyp otyr», - dedi Alık Aıdarbaev.
Óńdeý ónerkásibiniń negizgi kapıtalyna salynǵan ınvestıtsııa kólemi 411,1 mlrd teńgeni qurady. ıAǵnı, 2016 jyldyń qańtar- maýsym aılarymen salystyrǵanda 27,5 mlrd. teńgege ósip, 2,7%-ǵa artqan.
«Indýstrııalandyrýdyń ekinshi besjyldyǵy iske asyryla bastaǵannan beri (2015-2016 jj.) 7 trln teńgeniń 258 jobasy iske qosylyp, 21 myń turaqty jumys orny ashyldy. Al 2017 jyldyń jeti aıynda quny 489,8 mlrd teńgeden asatyn 32 joba iske qosyldy. Munda shamamen 3,9 myń jumys orny ashyldy», - dedi birinshi vıtse-mınıstr.
2017 jyldyń ekinshi jartyjyldyǵynda quny shamamen 1 trln teńgeden asatyn 100 jobany iske qosý josparlanǵan. Jobalar iske asqanda 10 myń turaqty jumys orny ashylatyn bolady.
