Indýstrııalandyrýdyń alǵashqy besjyldyǵynda makroekonomıkalyq mindetter sheshilgen joq
«Aqordada ótken Úkimettiń keńeıtilgen otyrysynda Prezıdent Mınıstrler Kabıneti jumysynyń aldaǵy negizgi basymdyǵy retinde ekonomıkany ártaraptandyrý máselesin atap ótti. Bul rette ındýstrııalyq-ınnovatsııalyq damýdyń jańa besjyldyqqa arnalǵan baǵdarlamasy qabyldanǵany belgili. Onda ónerkásiptiń basym salalary aıqyndalyp otyr. Jalpy, ekonomıkany ártaraptandyrý asa ózekti másele, óıtkeni ókinishke qaraı Údemeli ındýstrııalyq-ınnovatsııalyq damýdyń alǵashqy besjyldyǵy ónerkásip pen eksport qurylymyndaǵy negizgi makroekonomıkalyq mindetterdi sheshe almady. Baǵdarlamanyń nysanaly ındıkatorlarynyń basym bóligine qol jetkizilmeıin dep otyr», - dedi L. Muzaparova.
Onyń sózine qaraǵanda, baǵdarlamanyń makroekonomıkalyq nysanaly ındıkatorlarynyń oryndalmaýyndaǵy basty sebeptiń biri - qazaqstandyq ónerkásiptik óndiristiń syrtqy ekonomıkalyq konıýnktýraǵa barynsha táýeldiliginde. Sonyń ishinde munaı men metall naryǵyndaǵy syrtqy baǵalarǵa barynsha táýeldilik baıqalady.
Bul rette ınstıtýt sarapshysy «nysanaly kórsetkishterdiń ózgerýine Úkimettiń kúsh-jigerine qaraǵanda álemdik konıýnktýradaǵy ózgerister kóbirek úles qosyp jatqanyn» alǵa tartady.
«Osyǵan baılanysty 2015-2019 jyldarǵa arnalǵan ındýstrııalandyrýdyń ekinshi besjyldyq baǵdarlamasynda nysanaly ındıkatorlar quramy, ónerkásipti damytýdyń basymdyqtary, olarǵa memlekettik qoldaýlar bastan-aıaq qaıta qaraldy. Baǵdarlamanyń adresaty da naqty Qazaqstannyń ónerkásiptik sektoryn jaqsartýǵa áser ete alatyn ınnovatsııalyq salalarǵa, iri aýqymdy eksportqa baǵyttalǵan kásiporyndarǵa negizdelip, barynsha yqshamdalyp jınaqtaldy», - deıdi L. Muzaparova.
Bul rette ınstıtýt ókili áńgime munaı men gaz, taý-ken ónerkásibi salasy jóninde bolyp otyrǵanyn alǵa tartady. «Prezıdent atap ótkenindeı, dál osy salalarda jańa ken oryndaryn barlaýdyń aýqymdy jumystaryn júrgizýdiń, jumys istep turǵan qýattardy jańǵyrtýdyń mańyzy zor», - dedi ınstıtýt dırektorynyń orynbasary.
