Indýstrııalandyrý sheńberinde 4,2 mlrd teńgeniń jobalary iske qosyldy - Kókshetaý ákimi

Bul týraly búgin qala ákimi Ermek Marjyqpaev halyqpen esep berý kezdesýinde aıtty, dep habarlaıdy «QazAqparat» HAA tilshisi.

«Dostar» mádenıet saraıynda uıymdastyrylǵan alqaly jıynǵa QR Prezıdenti Ákimshiliginiń memlekettik ınspektory Qaldybek Báıimbetov qatysty. Esep berý kezdesýinde oblys ákimi Sergeı Kýlagın sóz sóılep, qala basshylyǵynyń aldyna Elbasy Joldaýynan jáne oblys ortalyǵyn odan ári damytý qareketinen týyndaıtyn jańa mindetterdi qoıdy. 
 

Qala ákiminiń aıtýynsha, oblys ortalyǵynda ónerkásip salasy qarqyndy damýda. Ótken jyldyń qorytyndysy boıynsha osy salada barlyǵy 89,8 mıllıard teńgeniń ónimi shyǵarylyp, aldyńǵy jylmen salystyrǵanda 10 mıllıard teńgege artqan. Sonymen qatar, qalada memlekettik baǵdarlamalar arqyly jańa jumys oryndary da kóptep ashylýda.
 

«Indýstrııalandyrý kartasy aıasynda jalpy quny 4,2 mıllıard teńgeniń 3 jobasy júzege asyrylyp, 300 turaqty jumys orny ashyldy. Sonyń ishinde aýyl sharýshylyǵy jáne kommýnaldyq tehnıkalardy shyǵaratyn «Qazaqstandyq Agro Innovatsııalyq Korporatsııasy» JShS-niń ındýstrııalyq-tehnologııalyq parkinde 232 jumys orny, úsh qabatty polıetılen plenkasyn óndiretin  «AsylArman» JShS-de  16 jumys orny, sút jáne sút ónimderin shyǵaratyn «Nátıje sút fabrıkasy» JShS-de 50 jumys orny ashyldy», - dedi qala ákimi.
 
Sonymen qatar, shahar basshysy atap ótkendeı, qazirgi kezde jalpy quny 3,6 mıllıard teńgeni quraıtyn 3 joba júzege asyrylýda. Olar - kombaındardy qurastyryp, shyǵaratyn «Vektor» kombaın zaýyty» JShS, joǵary qysymǵa tózimdi qolǵaptar zaýyty «KAZHYDRO» JShS, metall ónimderdi shyǵaratyn «KOKSHETAUOPTOELECTRONICS» JShS. Óndirister 2018 jyly iske qosylǵan kezde jańadan 196 jumys orny ashylatyn bolady.

Jalpy, Kókshetaý qalasy boıynsha ındýstrııalandyrý kartasyna quny 21,7 mıllıard teńgeniń 19 jobasy engizilgen. Atalǵan jobalardy júzege asyrý arqyly jańadan 1357 eńbek ornyn ashý kózdelgen.