Indýstrııalandyrý kúni aıasynda 15 mlrd. teńgeni quraıtyn kelisimsharttar men memorandým jasalady - A. Raý
Búgin elordada ótip jatqan Indýstrııalyq forým aıasyndaǵy «Qazaqstandyq qamtý-2012» forýmyn ashqan Indýstrııa jáne jańa tehnologııalar vıtse-mınıstri Albert Raý osylaı málim etti.
«Qazaqstanda jańa ónimderdi, jańa kásiporyndar men óndiristi damytý barysynda ornyqty suranysty qamtamasyz etý máselesi asa mańyzdy ról atqarady. Bul, ásirese mashına jasaý, jeńil ónerkásip, farmatsevtıka salasy sekildi baǵyttarda, onyń ishinde bizdiń ımportqa táýeldi tusymyzda asa ózekti. Bul eń aldymen mashına jasaý salasyna qatysty. Óıtkeni, búgingi kúni elimizdiń 40 paıyz ımporty mashına jasaý ónimderi bolyp tabylady», - dedi Indýstrııa jáne jańa tehnologııalar vıtse-mınıstri Albert Raý.
Onyń aıtýynsha, búgingi kúni júzege asyp jatqan jobalardyń barlyǵy básekege qabiletti, eksporttyq áleýeti zor sanalatyn nysandar bolmaq. Degenmen, ondaı nysandar úshin bastapqy qalyptasý kezeńinde ornyqty suranystyń bolǵany mańyzdy. Bul eń aldymen elimizdiń ulttyq kompanııalary, «Samuryq-Qazyna» UÁQ-ǵa kiretin kompanııalar jáne júıe qurýshy kásiporyndar tarapynan qamtylýy tıis shara.
«Sondyqtan da, búgingi Indýstrııalandyrý kúni qarsańynda elimizdiń árbir óńirlerinde osyǵan uqsas sharalar ótti. Onda óńirlik jobalar jetistigi kórsetilip, qazaqstandyq qamtý máselesine, otandyq óndirisshini qoldaýǵa arnalǵan sharalar talqylandy. Osyǵan oraı, shara aıasynda 50-ge tarta kelisimsharttar men memorandýmdar jasalady dep kútilýde. Bular shamamen 15 mlrd. teńgeni quraıtyn bolady», - dedi A. Raý.
