Indýstrııalandyrý kartasynyń ınvestorlaryn kóliktik ınfraqurylymmen qamtamasyz etý kerek - Úkimet basshysy

ASTANA. 30 sáýir. QazAqparat - Búgin Úkimet otyrysynda Premer-Mınıstr Serik Ahmetov kóliktik ınfraqurylymdy damytý boıynsha jańa baǵdarlamany Údemeli ındýstrııalyq-ınnovatsııalyq damý memlekettik baǵdarlamasymen ushtastyrýdy tapsyrdy.

QR Kólik jáne kommýnıkatsııa mınıstri Asqar Jumaǵalıevtiń sózine qaraǵanda, ÚIID MB-ny júzege asyrýdyń úsh jylynda 2 664 shaqyrym jol qaıta salynyp, 3 282 shaqyrym respýblıkalyq mańyzdaǵy jáne 8 331 shaqyrym jergilikti mańyzdaǵy joldarǵa jóndeý júrgizildi. Buǵan qosa Qyzylorda, Kókshetaý, sondaı-aq Aqtaýdaǵy áýejaılardaǵy ushý jáne qoný jolaqtary qaıta jasaldy.

«Jalpy ınfraqurylymdy damytý boıynsha máseleler bar. Osyǵan baılanysty Memleket basshysynyń tapsyrmasy aıasynda «Kóliktik ınfraqurylym» baǵdarlamasy ázirlenýde. Biz atalǵan baǵdarlamanyń konsýltanttarymen tıisti usynystar daıarladyq. Sonymen qatar barlyq óńirlerde qoǵamdyq tyńdaýlar ótkizip, jaqynda usynystardy kelisý úshin memlekettik organdarǵa jiberdik. Osydan keıin kóliktik ınfraqurylymnyń barlyq máselelerin talqylaý úshin ony Úkimet deńgeıinde engizýdi josparlaýdamyz»,-dedi mınıstr.

Óz kezeginde S. Ahmetov ınfraqurylymdy damytý baǵdarlamasy ekonomıkanyń ozyq ósimin qamtamasyz etýge baǵdarlanýy tıis ekenin, bul turǵyda Indýstrııalandyrý kartasyn qamtamasyz etýdiń qajettigin atap ótti.

Onyń aıtýynsha, taý-ken, bazalyq salalar jáne jalpy ekonomıkany damytý perspektıvalary bar baǵyttar toǵysýy kerek.

«Atap aıtqanda, ınvestorlardyń eshqaısysy da ınfraqurylymy joq jerge barmaıdy»,-dep túıdi Úkimet basshysy.