Indýstrııalandyrý kartasy: BQO-da 10 joba júzege aspaq
ORAL. QazAqparat - Batys Qazaqstan oblysynda bıyl Indýstrııalandyrý kartasy aıasynda 10 joba júzege asyrylmaq. Bul týraly búgin óńirlik kommýnıkatsııalar qyzmeti alańynda BQO kásipkerlik jáne ındýstrıaldyq-ınnovatsııalyq damý basqarmasynyń basshysy Arman Jalmaǵambetov málim etti, dep habarlaıdy QazAqparat tilshisi.
Onyń aıtýynsha, qazirgi tańda 3,3 mlrd teńgeni quraıtyn alty joba Indýstrııalandyrý kartasyna engizilgen. Shamamen jańadan 200 jumys orny ashylady dep josparlanýda.
Atap aıtqanda, «Kýbleı» JShS mal sharýashylyǵy qaldyqtaryn óńdeý tsehyn salyp jatsa, «Agran» JShS sendvıch-panelder shyǵaratyn zaýytty, «Topan» JShS hımııalyq óndiris bazasyn, «134» JShS kirpish zaýytyn, «Global Procurement» JShS beton aralastyrý tsehyn iske qospaqshy. Sondaı-aq «Hasanov» JK kondıter ónimderin shyǵaratyn tsehty jańǵyrtýda.
Jalpy, óńirde Indýstrııalandyrý kartasy aıasynda ekinshi besjyldyqta jalpy quny 84,4 mlrd teńgeni quraıtyn 29 ınvestıtsııalyq joba (1340 turaqty jumys orny) júzege asyrylýda. Sonyń ishinde 2015-2016 jyldary 73,1 mlrd teńgege 12 (1800 jumys orny), 2017 jyly 8 mlrd teńgege 10 joba (782 jumys orny, 536-sy turaqty) iske qosyldy.
Aıta keteıik, 2017 jyly oblystyń ónerkásip kásiporyndary 1,9 trln teńgeniń ónimin óndirdi, bul aldyńǵy jylǵydan 5,5 paıyzǵa kóp.
«Ásirese, munaı óńdeý salasynda 27,8 mlrd teńge ónim alynyp, 1,8 esege artty. Ósim negizinen «Kondensat» AQ bazasynda benzın shyǵarý esebinen qamtamasyz etildi. Munda ótken jyldyń sáýir aıynda ashyq munaı ónimderin barynsha mol alýǵa múmkindik beretin vakýýmdy munaı aıdaý sektsııasy iske qosyldy. Sonymen qatar kómirsýtegi shıkizatyn qaıta óńdeýde munaı óńdeý zaýytynyń qýatyn jylyna 600-den 850 myń tonnaǵa deıin ulǵaıtýǵa jol ashatyn joba márege jetti. Qazirgi kezde dızel otynyn gıdrotazalaý sektsııasynyń qurylysy júrgizilýde. Dızel otynyn shyǵarýǵa múmkindik beretin bul qondyrǵyny bıyl jazda iske qosý kózdelýde. Kásiporyn osy jobalardy júzege asyrý úshin barlyǵy 51 mlrd teńge (155 mln AQSh dollary) kóleminde ınvestıtsııa salmaq», - dedi Arman Jalmaǵambetov.
