Indýstrııalandyrý kartasy aıasynda jańa zaýyt qarqyndy júmys isteýde
Indýstrııalandyrý kartasy aıasynda «Spetsstroıservıs» JShS-nyń usaq betondyq buıymdardy shyǵaratyn zaýyt qurylysy jobasy sátti júzege asty. Zaýyt qurylysy 2015 jyly aıaqtalǵanmen, ony iske qosý 2016 jylǵa keıin ysyrylǵan edi. «Hess-Oral» JShS-nyń dırektory Bolat Shákimovtiń aıtýynsha, quny 870 mln. teńge turatyn jobany «jandandyrýǵa» odan kóbirek, ıaǵnı «Sberbank» AQ-nyń enshiles bankiniń Oraldaǵy fılıalynan «Damý» kásipkerlikti damytý qorynyń oblystaǵy fılıalynyń kepildigimen nesıelik jáne qomaqty jeke qarajat jumsalǵan. Kásipker qolyndaǵy saǵaty men uıaly telefonynan basqa múlikteriniń barlyǵynyń kepildikke salynǵanyn aıtyp, ázildep qoıdy.
- Oral shaharynyń basshysy bolǵan kezimde kásipkerlerge óndiris ashyńyzdar, óńirdi damytýǵa, jańa jumys oryndaryn ashýǵa úles qosyńyzdar deýshi edim. Ozyq óndiristik tehnologııany tańdaýda kóp oılanyp, tolǵandym. Qurylys ındýstrııasy salasyna qural-jabdyq shyǵarýdan álemdik úzdikterdiń qatarynan tabylatyn nemis kompanııasyn qolaıly kórdim. Aýyzben aıtýǵa ońaı, is júzinde bankterden qoldaý tabýdyń, qaǵazbastylyqtyń qıyndyǵyn kórdim. Biraq bastaǵan sharýamdy aıaǵyna deıin aparaıyn dep namysymdy janydym, - deıdi Bolat Ádıetuly.
Oral qalasynyń Jelaev óndiristik aýmaǵynda ornalasqan onyń jańa zaýytynda usaq beton buıymdarynyń segiz túri shyǵarylýda. Ónim túrlerin óndirýge jergilikti jáne kórshiles Aqtóbe oblysynan ákelinetin shıkizat paıdalanylady. Qazirgi ýaqytta kásiporyn kúnine 1 myń sharshy metr órnektas, jol plıtalaryn, 2 shaqyrymdyq jıektas (bordıýr), 8 myń dana qabyrǵalyq bloktaryn óndiredi. Zaýyttaǵy tehnologııalyq jabdyqtardyń barlyǵy «Hess-GROUP» kompanııasynan, óndirisshiniń ózinen tikeleı satyp alynyp, ornatyldy. Ol - álemge tanymal, Eýropa, Soltústik Amerıka, Azııa elderinde enshiles fırmalary bar betondyq ındýstrııa jabdyqtaryn shyǵaratyn nemistiń mashına jasaý kompanııasy. Sondyqtan jańa zaýyttyń ónimderi eýropalyq tehnologııamen, nemis sapasymen jasalǵan deý oryndy. Ádettegi beton ónimderiniń «ómir súrý» jasy úsh jyl bolsa, jańa kásiporynnyń ónimderine 25 jylǵa kepildik beriledi.
Óndiris avtomattandyrylǵan, barlyq jumys úderisi komıýtermen basqarylady. Nemis kompanııasynyń mamandary qashyqtyqtan jumys barysyn, tehnologııalyq jabdyqtardyń qyzmetin baqylap otyrady. Qazirgi ýaqytta zaýyt ónimderi oblys aýmaǵyna shyǵarylýda. Sonymen qatar kórshiles oblystarǵa da shyǵarý jaıy sheshilýde. Óndirisshiniń mamandary kelip, zaýyttaǵylardy jabdyqtarmen jumys isteýge úıretti. Alty jigitti operatorlyqqa oqytýǵa 27 mıllıon teńge qarajat jumsaldy.
Qazir kásiporynda uzyn sany 30 adam nápaqasyn taýyp júr. Al sonyń ishinde óndiristik tsehta 20 adam jumys isteıdi. Konveıerinen dymqyl beton bloktaryn «balapandatyp» jatqan mashınaǵa eki operator basshylyq jasasa, ózgesi ónimniń sapasyn qaraıdy jáne daıyn ónimdi ári qaraı keptirýge áketedi. Dymqyl bloktar ınfraqyzyl sáýleniń kómegimen arnaıy jabdyqtalǵan bólek orynda keptiriledi. «Bizde Oraldyń jáne qalaǵa jalǵas Jelaev, Qus fabrıkasy shaǵynaýdandarynyń turǵyndar jumys jasaıdy. Jumysymyz yrǵaqty. Jumysshylar jasalǵan jumys aýqymyna saı jalaqy alady», - dedi óndiris bastyǵy Sergeı Chechıkov.
«Hess-Oral» JShS dırektory Bolat Shákimovtiń aıtýynsha, Oralda Zashaǵan kentindegi saıabaqta, oblystyq máslıhat ǵımaraty aldyna zaýyttyń órnektasy tóselgen. Nemistiń tehnologııasymen jasalǵan jıektastar ózge tehnologııaly ónimderge qaraǵanda sapaly. Sondyqtan jańa kásiporynnyń ónimin paıdalaný bıýdjet qarjysyn únemdeýge jol ashatyny kámil. Sondaı-aq shahardyń shaǵyn kóshelerine osy zaýytta óndirilgen jol plıtalaryn tóseýdiń artyqshylyǵy aıqyn. Óıtkeni olar ádette tóseletin asfaltty qabatpen salystyrǵanda, uzaq merzimge murty buzylmaı, sapaly kúıinde saqtalady.
Nemistiń sapasyna qyzyqqan kásipker Bolat Shákimov «tól týyndysy» nemistiń zaýytyn salyp alyp toqmeıilsip júrmegen syńaıly. Endi ol Tasqala aýdany jaǵyndaǵy opoka ken ornynyń shıkizatynan sapaly qurylys materıalyn óndirgisi keledi. Sondyqtan ınvestor izdeıdi. «Biter istiń basyna, jaqsy keler qasyna» demekshi, bul sharýany birlesip bastap, aıaqtaýǵa bir jaqsy tabylar degen úmitte.
