Indýstrııalandyrý kartasy aıasynda bıyl 13,3 myń turaqty jumys oryndary ashylady
ASTANA. 25 shilde. QazAqparat - Bıyl Indýstrııalandyrý kartasynyń jobalaryn iske qosý esebinen qosymsha 13,3 myń turaqty jumys oryndaryn ashý josparlanyp otyr.
Bul týraly búgin QR Premer-Mınıstriniń orynbasary - Indýstrııa jáne jańa tehnologııalar mınıstri Áset Isekeshevtiń qatysýymen ótken vedomstvonyń alqa májilisinde málim boldy.
Aıta keterligi, 2010 jyldan beri Indýstrııalandyrý kartasy aıasynda paıdalanýǵa berilgen nysandar arqasynda 2 trln. teńgeden astam somaǵa ónim óndirilgen. Onyń ishinde óńdeý ónerkásibindegi ónim 1 trln. tengege jýyqtaǵan.
«Jartyjyldyq qorytyndysy boıynsha hımııa ónerkásibinde - sala óndirisiniń ortasha kólemindegi Indýstrııalandyrý kartasy jobalarynyń úlesi 24 paıyzdy qurady. Bul kórsetkish qurylys materıaldarynyń óndirisinde - 13 paıyz, mashına jasaý salasynda 11 paıyz, al farmatsevtıkada 10 paıyzǵa teń boldy. Jalpy, 2012 jyly ІJÓ-niń 5 paıyzdyq ósiminde Indýstrııalandyrý kartasy jobalarynyń úlesi 1,3 paıyzdy nemese ósýdiń tórtten bir bóligin quraǵan», - delingen baspasóz baıanynda.
