Indýstrııalandyrý kartasy aıasynda ashylǵan kásiporynda 31 mıllıon jumyrtqa óndirildi - Aqmola oblysy
«Úsh bulaq-2005» JShS qus fabrıkasynyń atqarýshy dırektory Dıas Ispanovtyń aıtýynsha kásiporyn Astana qalasyn azyq-túlikpen qamtamasyz etý úshin oblys aýmaǵynda qolǵa alynǵan mańyzdy ınvestıtsııalyq jobalardyń biregeıi bolyp otyr.
«2014 jyly iske qosylǵan qus fabrıkasynyń jobalyq qýatty 450 myń taýyqqa arnalǵan. Sondaı-aq, táýligine 300 myń jumyrtqa óndirýge múmkindik beredi. Óndiris jyl ótken saıyn qarqynyn arttyryp keledi. Qazirdiń ózinde kásiporyn táýligine 130 myń dana jumyrtqa óndirýde. Osynyń arqasynda, eńbek ónimdiligi de arta tústi. Іriktelgen daıyn ónimdi karton qoraptarǵa salyp, arnaıy muzdatqyshtar ornatylǵan saqtaý bólmelerine jóneltemiz. Odan soń, Astana qalasy men elimizdiń ózge óńirlerindegi jáne aýdandardaǵy saýda oryndaryna shyǵarylady. Bul bizge jylyna 90 mıllıon dana jumyrtqa óndirýge ári 200 adamdy turaqty jumyspen qamtýǵa múmkindik bermek. Bıylǵy jyldyń 10 aıynda 31,1 mıllıon dana jumyrtqa óndirildi», - deıdi Dıas Ispanov.