Indýstrııalandyrý kartasy aıasynda 72 ınvestıtsııalyq joba júzege asyryldy-Aqmola oblysy
KÓKShETAÝ. QazAqparat - Aqmola oblysynda 2010 jyldan beri Indýstrııalandyrý kartasy aıasynda 158,8 mıllıard teńgeniń 72 ınvestıtsııalyq jobasy júzege asyryldy. Bul týraly aımaq basshysy Málik Myrzalınniń aımaqtyq kommýnıkatsııalar qyzmetinde óńirdegi buqaralyq aqparat quraldarynyń basshylarymen jáne respýblıkalyq basylymdardyń menshikti tilshilerimen ótkizgen baspasóz máslıhaty barysynda aıtyldy, dep habarlaıdy «QazAqparat» HAA tilshisi.
Bul jolǵy baspasóz máslıhaty buryn qalyptasqan dástúrden ózgeshe jaǵdaıda ótkizildi. Oblys ákimi halyqpen, onyń ishinde sol halyqtyń sózin sóılep, muń-muqtajyn bılik oryndaryna jetkizip júrgen buqaralyq aqparat quraldarynyń ókilderimen emen-jarqyn sóılesti.
Aımaq basshysynyń sózine qaraǵanda, 2010 jyldan bastap Indýstrııalandyrý kartasy aıasynda 158,8 mıllıard teńgeniń 72 ınvestıtsııalyq jobasy júzege asyrylǵan. Osy jobalardyń júzege asýynyń arqasynda 6,8 myń jańa jumys oryndary ashylǵan. Áli de 11 joba júzege asyrylmaqshy. Oıdaǵy jospar júzege asqan kezde 4,3 myń jańa jumys oryndary ashylady dep josparlanǵan.
Óńirde shaǵyn jáne orta kásipkerlik sharýasy da alǵa basýda. 2016 jyldyń sáıkes merzimimen salystyrǵanda bul oraıdaǵy kórsetkish 2,5 ese kóbeıgen. Kásipkerlikke dem beretin ınvestıtsııa kólemi de artyp keledi. 2016 jylǵy sáıkes merzimge qaraǵanda 121,4 paıyzǵa ósken. Osyndaı ilkimdi istiń arqasynda jumyssyzdyq deńgeıi birtindep azaıyp, ásirese, jastardy jumyspen qamtý oń jolǵa qoıyla bastaǵan. Ortasha aılyq jalaqy mólsheri de 7,6 paıyzǵa ósip, 101,3 myń teńgeni qurap otyr.
«Aqmola oblysyn negizinde agrarlyq oblys dep ataıdy ǵoı. Menińshe, aýyl sharýashylyǵy ǵana emes, bizdiń ólkede ónerkásip te qarqyndy damýda. Іri kásiporyndar az emes»,-dedi oblys ákimi óz sózinde.
