Indýstrııalandyrý baǵdarlamasy boıynsha oqyǵan alǵashqy magıstranttar 2017 jyly bitirip shyǵady - BǴM

ASTANA. QazAqparat - Qazaqstannyń joǵary oqý oryndarynda ındýstrııalandyrý baǵdarlamasy aıasynda qurylǵan zamanaýı zerthanalarda bilim alǵan alǵashqy magıstranttar 2017 jyly bitirip shyǵady. Bul týraly búgin Májiliste «Áleýmettik ınfraqurylymdy damytý» baǵytynda «Nurly jol» baǵdarlamasyn iske asyrýǵa bıýdjet qarajatynyń jáne Ulttyq qordan bólinetin qarajattyń tıimdi jáne nysanaly paıdalanýyn baqylaý jónindegi komıssııa otyrysynda málim boldy.

Atalǵan komıssııa «Nur Otan» partııasy fraktsııasynyń janynan qurylǵan bolatyn, ol mektepter, balabaqshalar qurylysyn, mektepke deıingi mekemelerde memlekettik arnaıy tapsyrystardyń ornalasýyn, elimizdiń 13 joǵary oqý ornynda zamanaýı zerthanalardy qurý máselesin qadaǵalaıdy.

Bilim jáne ǵylym mınıstrliginiń málimetine qaraǵanda, 2015 jyly 11 JOO-ǵa zerthanalar qurýǵa 3 mlrd teńge qarastyrylǵan. Sonyń ishinde 4 ulttyq joǵary oqý oryndaryna 1,5 mlrd teńge, 7 basqa joǵary oqý oryndaryna 1,5 mlrd teńge bólinip, qarajat tolyq ıgerildi. Bilim jáne ǵylym mınıstrligi Joǵary jáne joǵary bilimnen keıingi bilim departamenti dırektorynyń mindetin atqarýshy Gúlzat Kóbenovanyń aıtýynsha, 24 zerthana ındýstrııalandyrý saıasatymen aıqyndalǵan 8 baǵyt boıynsha jumys isteıtin bolady.

«Aıta keterligi, 2017 jyldyń alǵashqy toqsanynda osy bilim baǵdarlamasymen jáne jabdyqtalǵan zamanaýı zerthanalarda bilim alǵan alǵashqy magıstranttar oqýlaryn bitirip shyǵatyn bolady.  Eń bastysy, olardy jumyspen qamtý úshin oqý mekemeleri Indýstrııalyq-ınnovatsııalyq damý baǵdarlamasy kásipkerlerimen barlyq qajetti jumystardy atqaryp shyqty. ıAǵnı, JOO-magıstrant-kásiporyn arasynda úshjaqty kelisimshart jasaldy. Ol kelisimshartta jumysqa qabyldaıtyn kásiporyn bazasynda óndiristik tájirıbeden ótý máseleleri qamtylǵan bolatyn», - dedi G.Kóbenova.

Eske sala keteıik, elimizdegi joǵary oqý oryndaryn zamanaýı zerthanalarmen jabdyqtaý úshin 2015-2016 jyldarǵa 6 mlrd teńge qarastyrylǵan. Osyǵan baılanysty 2015 jyly 11 bazalyq joǵary oqý ornynda 24 jańa zerthana, al 2016 jyly 13 JOO-da 26 zerthana qurý josparlandy.