Indýstrııalandyrý aıasynda mashına jasaý salasynda 114 joba iske asty - mınıstr
NUR-SULTAN. QazAqparat – Qazaqstanda Hyundai kompanııasymen birge avtokólik shyǵarý jobasy qolǵa alyndy.
Bul týraly QR Indýstrııa jáne ınfraqurylymdyq damý mınıstri Roman Sklıar aıtty, dep habarlaıdy QazAqparat tilshisi.
«Mashına jasaý salasynda ashylǵan bir jumys orny ilespe salalarda 5-6 jumys ornyn ashady. Indýstrııalandyrý baǵdarlamasy qolǵa alynǵannan beri mashına jasaý salasynda 114 joba iske asty. Salany yntalandyrý úshin Úkimet qosymsha qun salyǵy boıynsha jeńildikter berip, jeńildetilgen nesıe, lızıng, eksporttyq qoldaý sharalaryn usynyp otyr. «Óndiristik kooperatsııa» baǵdarlamasy qolǵa alyndy. Osynyń arqasynda otandyq mashına jasaý ónerkásibine «Global-2000» tizimine enetin Alstom, General Electric, SMS, Jac-Motors, Hyundai sııaqty iri transulttyq korporatsııalarmen áriptestik ornady», - degen mınıstr eksport aıasyn arttyrý úshin álemdik brend óndirýdiń alǵashqy qadamdary jasalyp jatqanyn atady.
«Eksportqa shyǵaratyn ónim aıasy keńip keledi. Biz qosymsha qunnyń ǵalamdyq tizbegine sátti ene bastadyq. Sáýir aıynda koperatsııalyq baılanystyrdy damytý úshin Reseı men Qazaqstan arasynda birlesken áreketter jospary qabyldandy. Osy aıda Hyundai avtomıobılderin shyǵaratyn Qazaqstandaǵy tuńǵysh zaýyt irgesin qalady. Qytaımen seriktestik aıasynda kólik dóńgelekteri men qozǵaltqyshtaryn jasaıtyn zaýytty iske qosý josparlanǵan. Qazirdiń ózinde mashına jasaý salalarynyń arasynda avtomobıl óndirisi kósh bastap tur. Bul sózsiz qýanarlyq jaıt. Búginde bizde avtokóliktiń barlyq sanaty óndiriledi. Elimizde 167 avtomobıl modeli qurastyrylady. Onyń ishinde 39 jeńil kólik modeli, 22 álemdik brend shyǵarylady. Inýdstrııalandyrýdyń eki besjyldyǵynda iri jelilik qurastyrýdan usaq jelilik qurastyrý deńgeıine shyqtyq. 2010 jyldan beri óndiris kólemi 8 ese artyp, 4000 danadan 32 myń danaǵa jetti. Avtoóndiristiń mashına jasaý salasyndaǵy úlesi 19 paıyzdy qurap otyr. Bıyl da osyndaı ósim deńgeıi saqtalatyn túri bar. Qazirdiń ózinde 56 paıyz ósimge qol jetkizildi», -dedi Roman Sklıar.
