Indýstrııa jáne jańa tehnologııalar mınıstrigi Ulttyq eksporttyq strategııany ázirledi

ASTANA. 15 qańtar. QazAqparat - Indýstrııa jáne jańa tehnologııalar mınıstrligi «Kaznex Іnvest» Eksport jáne ınvestıtsııalar ulttyq agenttigimen birlese otyryp, QR Ulttyq eksporttyq strategııasyn ázirledi. Bul týraly búgin «Kaznex Іnvest» Eksport jáne ınvestıtsııalar ulttyq agenttigi tóraǵasynyń orynbasary Meıirjan Máıkenov málim etti.

Onyń aıtýynsha, 2013 jyldyń jeltoqsan aıynda jasalǵan strategııa eldiń ındýstrııaldandyrý saıasatynyń ekinshi besjyldyǵynyń kontseptsııasymen etene jaqyn etip jasaldy. «Strategııa Indýstrııaldandyrý baǵdarlamasynyń ekinshi besjyldyǵy aıasynda saýda saıasatynyń marketıngtik baǵytyn aıqyndaıdy», - dedi ol.

UES el eksportyna qoldaý kórsetýdiń negizgi sharalaryna Kásipkerlerdiń ulttyq palatasymen birlese otyryp, shetelde qazaqstandyq taýarlarǵa qoldaý kórsetý jelisin qurý, eksportshylarǵa arnalǵan qarjylyq qyzmet tizimin keńeıtý jáne kóliktik-logıstıkalyq qyzmetterdi jaqsartý kiredi.

Strategııa sheńberinde metallýrgııa, kólik qurastyrý, hımııa jáne tamaq ónerkásibiniń taýarlaryna eksporttyq basymdyq berilmek. Sonymen qatar qazaqstandyq eksporttyń ótkiziletin negizgi 12 naryǵy anyqtaldy. Olar: Reseı, Ózbekstan, Qyrǵyzstan, Tájikstan, Túrkimenstan, Armenııa, Ázirbaıjan, Grýzııa, Qytaı jáne onyń batysyndaǵy aımaqtar, Aýǵanstan, Iran jáne EO naryǵy.

Atalmysh qujatty daıyndaý barysynda álemniń 100-ge jýyq elinde ulttyq eksporttyq strategııalardy qurý boıynsha tájirıbesi bar Halyqaralyq saýda ortalyǵynyń sarapshylary tartyldy.