Indýstrııa jáne saýda vıtse-mınıstri aımaqtaǵy ınvestıtsııalyq jobalardyń júzege asyrylý barysymen tanysty

ASTANA. Naýryzdyń 5-i. QazAqparat - Indýstrııa jáne saýda vıtse-mınıstri Erhat Esqalıev ınvestıtsııalyq jobalardyń aımaqta júzege asyrylý jumystaryn baqylaý maqsatynda naýryzdyń 5-i kúni Almatyda boldy,

dep habarlaıdy QazAqparat.

Sapar barysynda vıtse-mınıstr Almaty qalasy ákimshiliginiń qyzmetkerlerimen, ınvestıtsııalyq jobalardy usynýshylarmen jáne bıznes-qaýymdastyqtary men qoǵamdyq uıym ókilderimen júzdesip, jobalardyń júzege asyrylý jaıymen tanysty. Sondaı-aq ol Almatyda «Belkamıt SP» aktsıonerlik qoǵamynda bolyp, onda mashınaqurylysy kompanııasynyń ókilderimen qazaqstandyq úlesti arttyrý máselesi tóńireginde májilis ótkizdi. Budan keıingi jıyn Almaty qalasynyń ákimshiliginde ótip, oǵan qaladaǵy kásiporyndardyń jetekshileri men qoǵamdyq birlestik ókilderi qatysty. Onda ınvestıtsııalyq jobalardyń júzege asyrylýy men oǵan memlekettik qoldaý kórsetý jáne eldegi ózge de birqatar salalardy damytý máselelerin ortaǵa saldy. Sonymen qatar ákimshilikte ótken jıynda eldi ındýstrııalızatsııalandyrý kartasy, Medeý-Shymbulaq máseleleri men ındýstrııalyq aımaqtardy damytý problemasy sóz boldy. «Memleket shıkizattyq emes taýarlardy óndirýdi damytý isine sondaı-aq ınnovatsııalyq tehnologııalardy endirýge úlken qoldaý kórsetedi», dedi E.Esqalıev.

Onyń sózine qaraǵanda, 2015 jylǵa deıin údetilgen - ındýstrııalyq-ınnovatsııalyq damýdyń basym baǵyty ınvestıtsııalyq jobalardy qazaqstandyq úlesin arttyrý arqyly júzege asyrý bolyp tabylady.