Indýstrııa jáne saýda mınıstri «Qorǵas» ortalyǵynyń jumysyn synǵa aldy
ASTANA. Jeltoqsannyń 9-y. QazAqparat - QR Indýstrııa jáne saýda mınıstri Áset Isekeshev «Qorǵas» shekara mańy yntymaqtastyǵy halyqaralyq ortalyǵy AQ qyzmetiniń máseleleri boıynsha keńes ótkizdi jáne Ortalyq basshylyǵyn qatań synǵa aldy,
dep habarlaıdy QazAqparat atalmysh vedomstvonyń aqparat basqarmasyna silteme jasap.
Aqparat basqarmasynyń málimetinshe, Ortalyq ınvestorlardy tartý jónindegi jumysty jetkiliksiz túrde júrgizedi; nysandardy, merzimderdi, qarajattaǵy qajettilikterdi kórsete otyryp, «Qorǵas» ShMYHO» AQ-yn paıdalanýǵa berýdiń qysqartylǵan nusqasy boıynsha másele pysyqtalmaǵan; Ortalyqty odan ári damytý, onyń ishinde, Qazaqstannyń Keden odaǵyna kirýi sheńberinde odan ári damytý kórinisi joq. «Qorǵas» ShMYHO» AQ-nyń jumysyna qatysty mundaı syndar QR Indýstrııa jáne saýda mınıstrliginde ótken keńeste aıtyldy.
«Memlekettik jáne aýdıtorlyq uıymdar anyqtaǵan Ortalyqtyń qyzmetindegi júıeli túrde jol berilip kelgen buzýshylyqtar otyrysty ótkizýdiń basty sebebi boldy. Osyǵan baılanysty, Mınıstr Іshki aýdıt basqarmasyna memlekettik satyp alý týraly zańnamanyń talaptaryn saqtaý máselelerimen qosa, qarajattyń nysanaly jáne tıimdi paıdalanylýy mánine qosymsha tekserý júrgizýdi tapsyrdy», delingen Aqparat basqarmasynyń málimetinde.
