Indýstrııa jáne saýda mınıstri ınvestıtsııalyq jobalardy baqylaıtyn shtabtarǵa birqatar mınıstrlikterdiń ókilderin qosýdy usyndy
ASTANA. Qańtardyń 11-i. QazAqparat /Ernur Aqanbaı/ - Indýstrııa jáne saýda mınıstri Áset Isekeshev ekologııa jáne ónerkásip qaýipsizdigi máselesin baqylap otyrý úshin elimizde bastalatyn ınvestıtsııalyq jobalardyń júzege asyrylý barysyn baqylaý jónindegi shtabtardyń quramyna birqatar mınıstrlikterdiń ókilderin qosýdy usyndy.
Ol bul usynysyn búgin Úkimettiń selektorlyq keńesinde bildirdi, dep habarlaıdy QazAqparat.
Atap aıtqanda, Á. Isekeshev atalmysh shtabtardyń quramyna Energetıka jáne mıneraldyq resýrstar, Kólik jáne kommýnıkatsııa, Tótenshe jaǵdaılar, Eńbek jáne halyqty áleýmettik qorǵaý, Qorshaǵan ortany qorǵaý, Bilim jáne ǵylym mınıstrlikteriniń, sondaı-aq Qurylys jáne turǵyn úı-kommýnaldyq sharýashylyq isteri jónindegi agenttiktiń ókilderin qosýdy usyndy. «Bul olardyń shtabtarda jumys istep, basynan bastap ekologııa, ónerkásip qaýipsizdigi máselelerin muqııat baqylap otyrýlary úshin qajet. Bul jobalardyń júzege asyrylýynyń birinshi kezeńinde týyndaıtyn problemalardy shuǵyl sheshýge múmkindik beredi», dedi ol.
