Indýstrııa mınıstrliginde ótkizý pýnktterin damytatyn bólimshe ashylmaq
«Búgingi kúni Qazaqstan Respýblıkasynyń zańnamasyna sáıkes Qytaı Halyq Respýblıkasymen, Ózbekstan Respýblıkasymen jáne Túrkimenstan Respýblıkasymen shekaradaǵy ótkizý pýnktterin damytýdy kedendik rásimderdi júrgizýge baılanysty QR Qarjy mınıstrliginiń Memlekettik kirister komıteti júzege asyrady. Óz kezeginde, Qyrǵyzstan Respýblıkasymen jáne Reseı Federatsııasymen Kedendik odaq yntymaqtastyǵynyń aıasynda Qazaqstan-Reseı jáne Qazaqstan-Qyrǵyzstan shekarasyndaǵy ótkizý pýnktteri Ulttyq qaýipsizdik komıteti Shekara qyzmetiniń (budan ári – Shekara qyzmeti) teńgeriminde», - dedi Asqar Mamın.
Úkimet basshysynyń dereginshe, Qazaqstan Respýblıkasynyń Memlekettik shekaradaǵy ótkizý pýnktteri ınfraqurylymyn jaqsartý jóninde keshendi sharalar qabyldaý maqsatynda 2019 jylǵy 25 qazanda Úkimettiń janyndaǵy Memlekettik shekara komıssııasynyń otyrysy ótti.
Osy otyrystyń qorytyndysy boıynsha Shekara qyzmeti ótkizý pýnktterin salý jáne rekonstrýktsııalaý jumystaryn júrgizý úshin Indýstrııa jáne ınfraqurylymdyq damý mınıstrliginiń teńgerimine beredi. Atalǵan jumystar aıaqtalǵannan keıin ótkizý pýnktteri Shekara qyzmetiniń teńgerimine qaıtarylatyn bolady. Sonymen birge Qazaqstan Respýblıkasynyń Memlekettik shekarasy arqyly avıatsııalyq, avtomobıl, teńiz, ózen jáne temirjol ótkizý pýnktterin damytý salasyndaǵy memlekettik saıasatty ázirleý jáne iske asyrý máselelerin biryńǵaı úılestirý maqsatynda osy baǵyt boıynsha fýnktsııalardy júkteı otyryp, mınıstrliktiń janynan jekelegen bólek qurylymdyq bólimshe ashý máselesi pysyqtalýda.
Aıta keteıik, Senat depýtattarynyń Premer-Mınıstr atyna joldaǵan saýalynda baqylaý-ótkizý pýnktteriniń (avtokólik, temirjol, avıatsııa) ınfraqurylymyn qurý, ustaý jáne damytý fýnktsııalaryn bir memlekettik organǵa (mınıstrlikke) júkteý, onda jeke qurylymdyq bólim quryp, qoldanystaǵy barlyq ótkizý pýnktterin onyń baqylaýyna berý máseleleri kóterilgen bolatyn.
«Tehnıkalyq jabdyqtaý jáne qyzmet kórsetý problemalarynan basqa, ótkizý pýnktteriniń ınfraqurylymyn damytý máselesi ótkizý pýnktteriniń jaǵdaıyn jasaý, salý, qaıta qurý, paıdalaný fýnktsııalaryn júzege asyratyn biryńǵaı ýákiletti organnyń bolmaýy sebepti tereńdeı tústi. Olar ártúrli memlekettik organdar men uıymdardyń balansynda tur (UQK ShQ, IIDM, QM MKK, «QTJ» AQ). Ótkizý pýnktteri eldiń kólik júıesiniń quramdas ári ajyramas bóligi retinde qarastyrylmaıdy jáne tıisti salalyq baǵdarlamalarǵa kirmeıdi. Mundaı jaǵdaı qosymsha qıyndyqtar týǵyzyp, ótkizý pýnktterin jańǵyrtý jobalaryn júzege asyrýdaǵy ózara baılanysty qıyndatady», - dep atap ótedi senatorlar.
