Indýstrııa mınıstrligi Soltústik Qazaqstan oblysyndaǵy jańa jobalardy aıqyndady
Aıta keteıik, búgin Úkimet otyrysynda QR Ulttyq ekonomıka mınıstri Áset Erǵalıev Soltústik Qazaqstan oblysynyń 2021-2025 jyldarǵa arnalǵan áleýmettik-ekonomıkalyq damýynyń keshendi josparyn tanystyrdy.
«Soltústik Qazaqstan oblysynyń 2021-2025 jyldarǵa arnalǵan áleýmettik-ekonomıkalyq damýynyń keshendi jospary aıasynda mınıstrlik jetekshilik etetin salalarda 36 is-sharany iske asyrýǵa jumyldyrylǵan. Ónerkásip salasynda Soltústik Qazaqstan oblysynda 2025 jylǵa deıingi keshendi josparǵa sáıkes 4 500 jumys ornyn qurýmen jalpy somasy 376,5 mlrd teńgege óńdeýshi salada 20 jobany iske qosý josparlanyp otyr.
Bıyldyń ózinde shamamen 1 myń jumys ornyn qurý arqyly ınvestıtsııa kólemi 28,9 mlrd teńge bolatyn 8 jobany iske qosý josparlanǵan. Óńirde óńirlik mamandaný keńeıip keledi. Іske asyrylyp jatqan jobalar esebinen aǵash óńdeý, farmatsevtıka, qaǵaz, jıhaz salasynyń damýyna serpin berildi. Óńirde lamınattalǵan fanera men shpon óndirý boıynsha jobalar iske qosyldy», - dedi mınıstr.
Onyń aıtýynsha, bıyl óńirde aǵash-jońqa jıhaz plıtalaryn shyǵarý boıynsha jobasy engiziledi. Sonymen qatar, qaǵaz jáne karton óndirý boıynsha joba júzege asyrylyp jatyr.
Budan bólek, «Medeksport-Soltústik juldyz» jaýapkershiligi shekteýli seriktestiginiń dári-dármek shyǵarýdy josparlap otyr.
«Óńirde sondaı-aq ızotermııa vagondar shyǵaratyn Qazaqstandaǵy jalǵyz «Cool Infinity» jaýapkershiligi shekteýli seriktestigi kásiporny jumys isteıdi. Bıyl kásiporynda aýqymdy qaıta qurý josparlanǵan. Shyǵarylatyn vagondar sany jylyna 300-den 1 400 deıin 4 esege ósedi. Ónimniń basym bóligi Reseı men TMD elderine eksporttalatyn bolady. Soltústik Qazaqstan oblysynda 1-shi transformator zaýytynyń qurylysy aıaqtalýda. Bul kompanııanyń ónimderi eksportqa shyǵarýǵa baǵyttalǵan», - dedi B. Atamqulov.
Onyń sózine qaraǵanda, READY-BUILT FACTORY qaǵıdaty boıynsha toqtap turǵan obektiler bazasynda jańa óndiristik alańdar salý 450 jumys ornyn qurýmen 21,6 mlrd teńge somasyna 4 jobany iske qosýdy qamtamasyz etýge múmkindik beredi. Tolyq qýatqa shyqqan kezde jobalardyń jyl saıynǵy óndiris kólemi 25,5 mlrd teńgeni quraıdy. Sondaı-aq, aǵymdaǵy jyly 30 mlrd teńge somasyna jyl saıyn 300 tehnıka shyǵarýmen aýyl sharýashylyǵy tehnıkasyn qurastyrý boıynsha jobany iske qosý josparlanǵan.
«Іske asyrylyp jatqan joǵary tehnologııalyq jobalar jastar úshin jáne jalpy Soltústik óńirdiń turǵyndary úshin sapaly, turaqty jumys oryndaryn saqtaýǵa ári qurýǵa,
sondaı-aq oblys halqynyń kóshi-qon aǵynyn odan ári tómendetýge múmkindik beredi», - dedi mınıstr.
