Indýstrııa mınıstrligi reseılik jolaýshylar vagonyn satyp alýǵa 18,7 mlrd teńge jumsamaq

NUR-SULTAN. QazAqparat - QR Indýstrııa jáne ınfraqurylymdyq damý mınıstrligi jolaýshylar vagonyn satyp alý úshin 2019 jyldyń naqtylanǵan bıýdjetinen 18,7 mlrd teńge bólýdi surap otyr. Bul týraly búgin 2019 jylǵa arnalǵan respýblıkalyq bıýdjet týraly Zańǵa úkimettik naqtylaýlardy talqylaý barysynda atalǵan vedomstvonyń vıtse-mınıstri Berik Kamalıev aıtty, dep habarlaıdy QazAqparat tilshisi.

«Qazaqstanda 2246 jolaýshylar vagony bolsa, sonyń búginde 46 paıyzynyń tozyǵy jetken. Bul vagondar jaramdylyq merzimine baılanysty qoldanystan alynýy tıis. Al biz olardy kúrdeli jóndep, qalpyna keltirý jumysymen aınalysyp jatyrmyz. 2018 jyly ǵana emes 2017 jyly da »Qazaqstan damý banki lızıng« arqyly 30 mlrd teńge somaǵa vagondar satyp alyp, aqshasyn tóledik jáne qazirgi ýaqytta bul 63 vagondy aldyq. Vagondar »Aqtóbe-Mańǵystaý« baǵytynda júredi. Olardyń barlyǵy Tver qurylys zaýytynan shyqqan. Olar bizge jaqsy jeńildik usynady. Al búgingi naqtylaýda biz »QDB lızıng« arqyly taǵy da 18,7 mlrd teńge surap otyrmyz», - dedi vıtse-mınıstr.

Onyń aıtýynsha, naqtylanǵan bıýdjette mınıstrlik usynysy qabyl alynyp, 18,7 mlrd teńge bólinetin bolsa, onda atalǵan qarajatqa jolaýshylar vagony satyp alynady. Vagondar «Almaty-Mańǵystaý», «Aqtóbe-Mańǵystaý» jáne Nur-Sultan-Saryaǵash« baǵyttarynda jolǵa shyǵarylady. Osylaısha atalǵan baǵyttaǵy jolaýshylar vagonynyń tapshylyǵy joıylady.