Indýstrııa mınıstrligi men Qazaqstandyq turǵyn úı kompanııasy zańnamany buzǵan - agenttik
QR Básekelestikti qorǵaý jáne damytý agenttiginiń dereginshe, Qazaqstandyq turǵyn úı kompanııasy qurylys kompanııalarynyń kepildik berý týraly ótinimderin qaraý rásimderin negizsiz toqtatyp, keıinge qaldyryp kelgen.
Qazaqstandyq turǵyn úı kompanııasy baspana qurylysyna úlestik qatysýǵa kepildik berý tetiginiń turaqty jáne tıimdi jumysyn qamtamasyz etý úshin turǵyn úı qurylysynyń biryńǵaı operatory mindetin atqarady. Biryńǵaı operator kepildi jaǵdaı týyndaǵanda úleskerlerdiń quqyqtary men zańdy múddelerin qorǵaýǵa da jaýapty.
«Atap ótetin jaıt, úleskerlerdiń qarajatyn tartýdyń eń tıimdi tásili – «Qazaqstandyq turǵyn úı kompanııasy» AQ kepildigin alý, bul asa mańyzdy. «Turǵyn úı qurylysyna úlestik qatysý týraly» Zańǵa sáıkes, Qazaqstanda turǵyn úı qurylysyna úlestik qatysýdy uıymdastyrýdyń úsh zańdy tásili bar: «Qazaqstandyq turǵyn úı kompanııasy» AQ kepildigin alý; Ekinshi deńgeıdegi banktiń jobasyna qatysý; qurylys salýshynyń óz qarajaty esebinen turǵyn úı ǵımaratynyń qańqasyn turǵyzǵannan keıin JAO ruqsatyn alý», - delingen QR Básekelestikti qorǵaý jáne damytý agenttiginiń aqparatynda.
Budan basqa, Qazaqstandyq turǵyn úı kompanııasy ınjınırıngtik qyzmetter kórsetetin belgili bir kompanııalarmen sharttar jasasýdy mindettegen. Atalǵan quqyqbuzýshylyqty joıý úshin Qazaqstandyq turǵyn úı kompanııasyna bir aı ýaqyt berildi.
Sondaı-aq, Indýstrııa jáne ınfraqurylymdyq damý mınıstrligine «Turǵyn úı qurylysyna úlestik qatysý týraly» zańda kózdelmegen artyq talaptardy joıý arqyly turǵyn úı qurylysyna úlestik qatysý salasyndaǵy erejelerge ózgerister engizý jóninde nusqaý berildi.
