Indýstrııa mınıstri qytaılyq aýyr tehnıka óndirýshi iri kompanııamen seriktestik ornatýǵa kelisti

ASTANA. QazAqparat - QR Indýstrııa jáne ınfraqurylymdyq damý mınıstri Marat Qarabaev Qytaı Halyq Respýblıkasyna jasaǵan jumys sapary barysynda SANY Renewable Energy Co Ltd kompanııasynyń «Nankoý» ónerkásiptik aımaǵyna bardy, dep habarlaıdy QazAqparat.

QR Indýstrııa jáne ınfraqurylymdyq damý mınıstrligi baspasóz qyzmetiniń habarlaýynsha, mınıstr jel týrbınalaryna arnalǵan arnaıy qurylǵylar shyǵaratyn zaýytta boldy.

Osy rette SANY Renewable Energy Co Ltd kompanııasy ártúrli qýattylyqtaǵy jel týrbınalaryn óndirý boıynsha álemdik kóshbasshylardyń biri ekenin aıta ketken oryndy. Sondaı-aq bul kompanııa avtojoldarda paıdalanylatyn arnaıy tehnıka, kóp tonnalyq krandar, burǵylaý tehnıkasy jáne basqa da aýyr tehnıkanyń iri álemdik óndirýshisi retinde belgili.

Kompanııanyń prezıdenti jáne onyń teń quryltaıshysy Djoý Fýgýı myrza jumystyń barysymen tanystyryp, zaýyttaǵy óndiris protsesi týraly aıtyp berdi.

Esterińizge sala keteıik, bıyl mamyr aıynda Memleket basshysynyń Sıan qalasyna sapary barysynda SANY Renewable Energy Co Ltd kompanııasy, sondaı-aq QR Energetıka mınıstrligi, «Samuryq-Qazyna» AQ, China Power International Holding Jambyl oblysynda qýaty 1 GVt bolatyn jel elektr stantsııasynyń qurylysy týraly tórt jaqty memorandýmǵa qol qoıǵan bolatyn.

Kezdesýdiń qorytyndysy boıynsha taraptar yntymaqtastyq ornatyp, seriktestikti odan ári damytý týraly kelisti. Sonymen birge Qazaqstan aýmaǵynda arnaıy tehnıka óndirisin jandandyrý múmkindikteri de talqylandy.