Indýstrııa mınıstri batys óńirlerdegi jol qurylysy týraly aıtty
«Batys óńirde jalpy uzyndyǵy 736 shaqyrym bolatyn «Aqtóbe - Atyraý - Astrahan» avtojoly qaıta jańartylyp jatyr (joba 2017 jyly bastaldy. Al, «Aqtóbe-Qandyaǵash» ýchaskesi 2021 jyly bastaldy). Uzyndyǵy 96 shaqyrym «Aqtóbe - Qandyaǵash» ýchaskesiniń 52 shaqyrymynda búgingi kúni qozǵalys ashyldy. Jyldyń sońyna deıin 44 shaqyrymda qurylys aıaqtalyp, Alǵa qalasy, Beshtamaq aýyly jáne Qandyaǵash qalasyn aınalyp ótý joldarynan ózgesiniń barlyǵynda qozǵalysty ashamyz. Osy jobany tolyq 2023 jyly aıaqtaımyz», - dedi Q. Óskenbaev.
Onyń aıtýynsha, 339 shaqyrym bolatyn «Qandyaǵash - Maqat» jobasy boıynsha barlyq asfalt-beton jumystary aıaqtaldy.
277 shaqyrymǵa sozylǵan «Atyraý - Astrahan» jobasy boıynsha búgingi kúni 60 shaqyrymda qozǵalys tolyq ashyldy. Sondaı-aq, jyldyń sońyna qaraı Tuşyqudyq, Aqqystaý jáne odan ári Janbaı eldi mekenderi arqyly taǵy 70 shaqyrymda jańa tósem boıynsha qozǵalys qamtamasyz etiledi. 147 shaqyrym joldaǵy qalǵan jumystar 2023 jyly iske asyrylady.
«Memleket basshysynyń tapsyrmasyna sáıkes, bıyl 72 shaqyrymdaǵy «Podstepnoe - Fedorovka» avtojolynyń eki ýchaskesin iske asyrýdy bastadyq (2022 jylǵa 6 mlrd teńge bólindi). Sondaı-aq, osy jyly 218 shaqyrymǵa sozylatyn «Qyzylorda - Jezqazǵan» jolynyń qurylysy bastaldy», - dedi mınıstr.
«Batys Qazaqstan oblysynyń joldaryn qalpyna keltirýge erekshe nazar aýdarylyp otyr. Jalpy uzyndyǵy 248 shaqyrym «Qaztalov - Jánibek - RF shekarasy» (145 km) jáne «Ónege - Bısen - Saıhın» (103 shaqyrym) joldarynda kúrdeli jóndeý júrgizilip jatyr. Ótken jyly bul baǵytta 55 shaqyrym joldaǵy qozǵalys ashyldy. Bıyl taǵy 80 shaqyrym avtojol paıdalanýǵa berilmek. Al, 113 shaqyrym joldaǵy qalǵan qurylys jumystary 2023 jyly júrgiziledi», - dedi vedomstvo basshysy.
Buǵan deıin mınıstr málim etkendeı, jyl sońyna deıin shamamen 1 myń shaqyrym joldy paıdalanýǵa berý josparlanyp otyr.
