Indýstrııa mınıstri atyraýlyqtardyń shaǵymyn tyńdady

ATYRAÝ. QazAqparat – Indýstrııa jáne ınfraqurylymdyq damý mınıstri Marat Qarabaev Atyraý oblysynyń turǵyndarymen kezdesip, azamattardy jeke máselesi boıynsha qabyldady, dep habarlaıdy QazAqparat tilshisi.

Marat Qarabaevtyń aıtýynsha, mınıstrliktiń mindetine birneshe salany damytý kiredi. Onyń ishinde ónerkásip óndirisi, jol jáne turǵyn úı qurylysy, ınjenerlik ınfraqurylym, kólik-logıstıkasy men jer qoınaýyn ıgerý, kólik qatynasy sekildi salalar bar.

Kezdesýde Atyraý turǵyndary kókeıdegi birneshe máseleni qozǵady. Máselen, Juldyz shaǵyn aýdanynyń turǵyndary kópten beri jerasty sýynan zardap shegip otyr. Óıtkeni atalǵan aýdanda káriz-tazartý júıesi jolǵa qoıylmaǵan. Al sonyń saldarynan kóktem-kúz mezgilinde turǵyndardyń júrip-turýy qıyndaıdy.

Osyǵan oraı mınıstr Qurylys jáne turǵyn úı-kommýnaldyq sharýashylyq isteri komıteti tóraǵasynyń orynbasary Baýyrjan Qabdolǵa atalǵan máseleni nazarǵa alýdy tapsyrdy. Káriz-tazartý júıesi respýblıkalyq bıýdjetten qarjylandyrylady. Sol sebepti keler jylǵa deıin jobalaý-smetalyq qujattamany daıyndaý isin tezdetip qolǵa alý kerek.

«Komıtet tóraǵasynyń orynbasary Baýyrjan Jaleluly shaǵyn aýdanǵa baryp, jaǵdaıdy baqylaýǵa alady. Sodan keıin bıylǵy shildede jobalaý-smetalyq qujattamany daıyndaýǵa qarjy qaralsa, ony jyl sońyna deıin aıaqtaý kerek. Sodan soń kelesi jylǵy shamamen maýsymda qurylys jumystaryna kirisýge bolady», – dedi Marat Qarabaev.

Al jergilikti kásipker Danııar Amangeldiuly Jaıyq ózeniniń jaǵasynda turǵyndar serýendeıtin oryn salýdy qolǵa alǵan. Alaıda kólik baqylaý ınspektsııasy kásipkerdiń jumysyna kedergi keltirip otyr.

«Taıaýda Atyraý óńirindegi kólik baqylaý ınspektsııasyna jańa basshy taǵaıyndaldy. Sol basshymen tyǵyz baılanysta bolýyńyzdy suraımyn. Kólik ınspektsııasynyń ókilderine aıtarym, kásibin adal júrgizip otyrǵan azamattarǵa jumys isteýge múmkindik berý kerek. Ekonomıkaǵa nuqsan keltirmeýimiz qajet», – dep málim etti Marat Qarabaev.

Mınıstrdiń jeke qabyldaýyna 7 adam keldi. Olar sýmen jabdyqtaý júıelerin retteý, avtojoldar qurylysy, áýe bıletteriniń baǵasy, turǵyn úı qurylysy qatynasy, elektr jelilerin tartý, sondaı-aq jer qoınaýyn ıgerýge qatysty máseleler kóterdi. Sondaı-aq atyraýlyqtardy ekologııa máselesi tolǵandyrady.

Eske sala ketelik, budan buryn Atyraýdan Reseımen shekaraǵa deıingi joldy jóndeýge 18 mlrd teńge bólingenin jazǵan edik.