Indýstrııa mamandary men top-menedjerler stýdentterdiń dıplomdyq jumystaryna jetekshilik etedi
Bul týraly Ǵylym jáne joǵary bilim mınıstri Saıasat Nurbek Úkimet otyrysynda aıtty.
«Mınıstrlik jańa oqý jylynyń bastalýyna daıyndyq jumystaryn júrgizip jatyr. Birinshiden, joǵary bilim berýdiń memlekettik jalpyǵa mindetti standartyna joǵary oqý oryndarynyń akademııalyq erkindigin odan ári keńeıtýdi kózdeıtin ózgerister engizildi. Atap aıtqanda, joǵary oqý oryndaryna kadrlardy daıarlaý baǵyttarynyń erekshelikterin eskere otyryp, jalpy bilim beretin pánder tsıkliniń birqatar pánderiniń mazmunyna derbes ózgerister engizý múmkindigin anyqtaıdy. Endi joǵary oqýoryndary bilim berý mazmunyn ózderi pishindeýge jáne baǵyttaýǵa múmkindik alyp otyr. Bazalyq jáne beıindeýshi pánder bloktary kredıtteriniń sanyn qatań reglamentteý alynyp tastaldy. Ol da akademııalylyq erkindiktiń bir kórinisi», - dedi Saıasat Nurbek.
Sondaı-aq, ol naqty óndiriste jetistikke jetken mamandardy akademııalyq protseske tartý kúsheıetinin atap ótti.
«JOO praktık-mamandar men top-menedjerlerdi stýdentter men magıstranttardyń dıplomdyq jáne zertteý jumystaryna jetekshilik etýge tarta alady. Indýstrııada, óndiriste, basqa da salalarda júrgen myqty mamandardy tikeleı akademııalyq protseske qosýǵa múmkindik berip otyrmyz.
Ekinshiden, bul – bilim berý baǵdarlamalarynyń mazmunyn ózektendirý. Búginde joǵary oqý oryndary eńbek naryǵynda suranysqa ıe daǵdylardy qalyptastyrý úshin ınnovatsııalyq bilim berý baǵdarlamalaryn ázirledi. «Jańa mamandyqtar atlasy» jáne «Halyqtyń kirisi» baǵdarlamasynyń aıasyndaǵy «Mamandyǵym – bolashaǵym» baǵyty boıynsha osy jumysty júıeli túrde engizip jatyrmyz», - dedi mınıstr.
