«Indýstrııa 4.0» qaǵıdatyn mektep qabyrǵasynan bastap meńgere bastaý kerek - Saltanat Rahymbekova

ASTANA. QazAqparat - «Tórtinshi ónerkásiptik revolıýtsııa jaǵdaıyndaǵy damýdyń jańa múmkindikteri» atty Prezıdent Joldaýynyń ınnovatsııa salasyndaǵy mindetterin qalaı júzege asyrýǵa bolady? Osy saýalǵa qatysty «QazAqparat» HAA tilshisine Joldaýdyń atalǵan baǵyty boıynsha «G-Global «jasyl ekonomıka» men damý koalıtsııasy» ZTB basqarma tóraǵasy Saltanat Rahymbekova tushymdy jaýabyn berdi, dep habarlaıdy «QazAqparat» HAA tilshisi.

«Tórtinshi ónerkásiptik revolıýtsııa «aqparattyq qoǵam», tolyqtaı ıntellektýaldyq ári qaldyqsyz óndiris, senimdi qajettilik, absolıýtti ári dáýirlik ınnovatsııalardy qurýdy kózdeıdi. Ol jaıly bizdiń Prezıdent «HHІ ǵasyrdaǵy jahandyq energoekologııalyq strategııa» kitabynda keńinen toqtalyp ótken bolatyn. Joldaýda «sapaǵa joǵary talap qoıa bilý, ǵımarattardyń ekologııasy men energııany únemdeýine» erekshe mańyz berý kerektigi aıtylady. «Jasyl» qurylystyń qaǵıdattary - tórtinshi ónerkásiptik revolıýtsııanyń taǵy bir basym tusy» - deıdi ol.

Onyń aıtýyna qaraǵanda, tórtinshi ónerkásiptik revolıýtsııany tereń zerttep, mektep qabyrǵasynan bastap balalar meńgeretindeı dárejede oqytý kerek.

«Demek, JOO-lar men stýdenttik qalashyqtar, tehnoparkter, tórtinshi ónerkásiptik revolıýtsııa tehnologııalaryn keshendi túrde ıgerý alańyna aınalýy tıis», - deıdi ol.

Saltanat Rahymbekova Joldaýda atalyp ótkendeı, «barlyq óńirlerdegi oqýshylar saraıynda balalar tehnoparki men bıznes-ınkýbatorlardy salýdyń» mańyzyna toqtaldy. Onyń aıtýynsha, tehnologııalyq broker, avtomattandyrylǵan jylyjaılardy qamtamasyz etý sekildi mamandyqtardy meńgerýdiń mańyzy asa joǵary. Tórtinshi ónerkásiptik revolıýtsııanyń kóshbasshylary - EKSPO-2017 aýmaǵynda salynyp jatqan Halyqaralyq ІT-startaptar tehnoparki men Jasyl tehnologııalardyń halyqaralyq ortalyǵy bola bilýi kerek.

Saltanat Rahymbekova sonymen birge, tyń tehnıkalyq negizde tsıfrly, «vırtýaldy» ekonomıkany damytýdyń mańyzdy ekenin tilge tıek etti.

«G-Global bazasynda tórtinshi ónerkásiptik tóńkeristiń ınnovatsııalary men «jasyl» jobalary úshin qarajat jınaıtyn kraýtfandıngti alań qurý kerek», - dep atap ótti ol.