Indýstrıaldy aımaqty salýǵa ketken qarjy memleketke eselep qaıtpaq
ALMATY. QazAqparat - Almatydaǵy Indýstrıaldy aımaqtyń ınfraqurylymyn salýǵa ketken qarjy memlekettik bıýdjetke 5-7 jyl ishinde eselep qaıtatyn bolady. Bul týraly Almaty ákiminiń orynbasary Erlan Áýkenov Indýstrıaldy aımaqtaǵy jańa óndiris oryndary men ınfraqurylymdy salý barysyn teksergen kezde aıtty, dep habarlaıdy QazAqparat.
Merziminen buryn iske qosylǵan jańa óndiris oryndarynyń biri 1 jyl ishinde qazynaǵa 70 mln teńge salyq quıdy. Al 2018 jyldyń aıaǵyna deıin 13 joba iske qosylǵan jaǵdaıda salyq kólemi 7 mlrd teńgege jetpek. Bul memlekettik bıýdjet qarjysynyń úshten birine teń bolady.
Indýstrıaldy aımaqtaǵy 40 kəsiporyn jalpy quny 190 mlrd teńge bolatyn jobalaryn júzege asyrady. Onyń 13 mlrd teńgesi qazir ınvestıtsııalanyp qoıǵan.
Memlekettiń ınfraqurylymǵa bólgen árbir teńgesine qaıtarym retinde kásiporyndar zaýyttar salý úshin 9 ese kóp qarjy jumsaıtyn bolady.
«Tokyo Rope», «Asia Steel Pipe Corporation» transulttyq kompanııalar ınvestıtsııalarynyń kólemi 37 mlrd teńgeden asady.
Almatydaǵy Indýstrıaldyq aımaq qazirdiń ózinde rezıdentter úshin mýltıplıkatıvti tıimdilik kórsetýde. Mysaly, kásiporyn ashý barysynda 5 000 jumys ornyn ashýǵa, shyǵarylǵan ónimdi ishki naryqta ótkizýge, osy arqyly ımportalmastyrý máselesin sheshýge bolady.
Sonymen qatar kásiporyndardyń basym kópshiligi eksportqa negizdelgen.
Indýstrıaldy aımaqtaǵy kəsiporyndarǵa barlyq ınfraqurylymdary júrgizilgen jer alady ári ınvestıtsııalyq kelisim negizinde salyqtyq- kedendik jeńildik beriledi. Indýstrıaldyq kartanyń arqasynda kásipkerlerdi qoldaý úshin ákimshilik kedergiler azaıǵan jáne ruqsat qujattaryn ázirleý men rásimdeý jedel jasalady. Osy mindetterdi oryndaý úshin Almaty qalasynyń ákimi Baýyrjan Baıbektiń tapsyrmasy boıynsha ár ınvestorǵa qoldaý kórsetý, túrli jobany tez jasaý úshin jumysshy toby qurylǵan edi.
Atap óterlik jaıt, mundaı aýqymdy jobalardyń maqsaty - Almaty aglomeratsııasy aıasynda óndiris oryndaryn qaladan syrt jerge ornalastyrý. Al bul bolashaqta qalanyń ortalyq aýdandaryndaǵy kólik júktemesin azaıtyp, ekologııalyq jaǵdaıdy jaqsartady.
