InDriver qoldanýshylarǵa 50 shaqyrymnan uzaq jolda adam tasýǵa shekteý qoıylýy múmkin

ASTANA. KAZINFORM – Kólik mınıstri Marat Qarabaev qalalar arasynda qatynaıtyn avtobýstardy básekege qabiletti etýdiń eki jolyn zerttep jatqanyn aıtty.

«Qarasańyzdar, eki qalanyń arasyna qatynaıtyn avtobýstar 2020 jyldan keıin joǵalyp ketti. Óıtkeni pandemııa keldi de kóp kisiler tsıfrlyq tehnologııaǵa ótti. Sonyń nátıjesinde InDriver óte kúshti boldy da, qazir halyq eki qalanyń arasynda qatynaıtyn turaqty avtobýstarǵa barmaı jatyr. Bir jaǵynan InDriver óte yńǵaıly. Óıtkeni úıinen alyp ketedi jáne tezirek júredi. Oǵan eki shara dep otyrmyz. Birinshi shara – qazir senatta qabyldanyp jatqan zań. Mysaly, bir núkteden ekinshi núktege deıin belgilengen jyldamdyq saǵatyna 120 shaqyrym dep belgilendi deıik. Eki araǵa odan jyldam jetip qoısańyz, sizge avtomatty túrde aıyppul keledi. Osylaısha jeńil kólikter men avtobýstyń ortasha jyldamdyǵy birdeı bolady dep oılap otyrmyz. Sonyń áserinen halyq qaıta avtobýsqa óte me degen oı», - dedi ol.

Mınıstr InDriver sııaqty agregattardyń qyzmet aıasy shektelýi múmkin ekenin aıtyp qaldy.

«Ekinshi usynys keıbir elderdiń tájirıbesimen baılanysty. Basqa elderde InDriver sııaqty agregattar qalalardyń arasynda qatynaýǵa haqysy joq. Mysaly, 50 shaqyrymnan alys aralyqqa jolaýshy tasymaldaýǵa shekteý qoıylýy múmkindik. Sondaı isteımiz be degen usynys bar. Bul naqty sheshim emes. Usynys qana. InDriver arqyly jumys istep júrgen jergilikti jigitter «tabysymyzdan qaǵylamyz» deýi múmkin. Bul bolmasa, basqa talaptar qoıýymyz kerek. Óıtkeni jol apatynyń kóbi jyldamdyqty asyrýdan nemese kólik júrgizýshiniń bir qaladan ekinshi qalaǵa jetken soń uıyqtamaı, taǵy da jolǵa shyǵyp ketýinen bolady. Ony birjaqty sheshý qıyn. Sondyqtan jan-jaqty talqylaı otyryp sheshim qabyldaımyz dep oılaımyn», - dedi Marat Qarabaev.