Indor hokkeıden respýblıkalyq týrnır jeńimpazy anyqtaldy
QYZYLORDA. QazAqparat - Taraz qalasy Talas aýdany ákiminiń júldesine arnalǵan ındor hokkeıden erler men qyzdar arasynda respýblıkalyq týrnır ótti, dep habarlaıdy QazAqparat tilshisi.
Qyzylorda oblystyq Dene shynyqtyrý jáne sport basqarmasynan málim etkendeı, erler arasynda óńirlik «Qaısar» komandasy týrnır jeńimpazy atansa, qyzdar komandasy kúmis júldeni ıelendi.
Jarysta erler arasynda «Úzdik qaqpashy» nomınatsııasynda Baqytbek Sársenbaıuly, qyzdar arasynda «Úzdik jartylaı qorǵaýshy» nomınatsııasynda Dıana Maratjanova marapattaldy.
Sportshylardyń aldaǵy jospary - qyzdar quramasy ústimizdegi jyldyń 5-12 aqpany aralyǵynda Germanııanyń Berlın qalasynda ındor hokkeıden ótetin Álem chempıonatyna qatysady. Al 20-29 naýryz aralyǵynda Almaty oblysynda bolatyn QR chempıonatynda erler jáne qyzdar komandalary oblys namysyn qorǵaıdy.
Komandany jarysqa ındor hokkeıden jáne kógaldaǵy hokkeıden QR eńbek sińirgen jattyqtyrýshysy Sultanbek Qoblandın daıyndady.
Aıta keteıik, kógaldaǵy hokkeıden 5-15 naýryz aralyǵynda Iordanııanyń astanasy Amman qalasynda ótetin Azııa chempıonatyna oblysymyzdan toǵyz sportshy Qazaqstan qurama sapynda óner kórsetse, joǵary lıga komandalary arasyndaǵy Reseı federatsııasynyń ashyq chempıonatynda «Qaısar» erler komandasy sheberlik baıqasady.
