Indonezııanyń janarmaı stantsııasyndaǵy órtten 17 adam qaza tapty
ASTANA. QazAqparat – Djakartadaǵy Pertamina memlekettik energetıka kompanııasyna tıesili janarmaı stantsııasynda bolǵan órtten 17 adam qaza tapty, dep habarlaıdy QazAqparat Reuters agenttigine silteme jasap.
Agenttik taratqan habarlamaǵa qaraǵanda, qaza tapqandardyń ekeýi – bala. Taǵy 50 adam jaraqat alǵan, onyń ishinde de bir bala bar.
Jergilikti ýaqytpen keshki 20.00-den keıin bastalǵan órtten birneshe úı órtenip ketken.
Pertamina kompanııasy ókili juma kúni keshke órt jergilikti ýaqytpen 22.30-da sóndirilgenin habarlady.
Zardap shekkenderdiń kóbin kúıik shalǵan. Indonezııa úkimeti barlyq emdeý shyǵynyn moınyna alady, dep málimdedi Djakarta gýbernatorynyń mindetin atqarýshy Herý Býdı Hartono.
Djakartanyń Tabıǵat apattarynyń saldaryn joıý agenttigi jergilikti turǵyndar jaqyn mańdaǵy meshitterge evakýtsııalanǵanyn habarlady. Sonymen qatar órt bolǵan otyn saqtaý stantsııasynyń 300 myń kılolıtrden asa qýaty bar ekeni aıtylýda.
