Indonezııanyń Lion Air ushaǵy sıyrdyń kesirinen ushý jolaǵynan shyǵyp ketti
ASTANA. 7 tamyz. QazAqparat - Indonezııanyń Lion Air áýe kompanııasynyń ushaǵy sársenbige qaraǵan túni shyǵys provıntsııanyń Gorontalo áýejaıynda jerge qoný kezinde sıyrǵa soǵylyp,
ushý-qoný jolaǵynan shyǵyp ketti, dep habarlady Detik.com ınternet-portaly.
«Áýejaı ýaqytsha jabyldy», - dep málimdedi Indonezııa kólik mınıstrliginiń resmı ókili Bambang Ervan.
Oqıǵa ornynan habarlaǵandaı, ushqysh ushý-qoný jolaǵynda júrgen úsh sıyrdy baıqap qalyp, olarǵa soǵylmaýdyń áreketin jasaýǵa tyrysqan. Alaıda múıizdi iri qaranyń biri ushaqtyń shassıine soǵylyp, tejegish isten shyqqan. Sonyń kesirinen áýe kemesi ushý-qoný jolaǵynan 10 metrge shyǵyp ketken.
Abyroı bolǵanda, avıalaınerdegi 110 jolaýshy men 7 ekıpaj múshesiniń eshqaısysy zardap shekken joq. Tek ushaq sál zaqymdandy. Oqıǵanyń oryn alý sebepteri anyqtalyp jatyr.
