Indonezııanyń iri kompanııalary ERG jáne Qazmunaıgazben kelissóz júrgizip jatyr
ASTANA. KAZINFORM – Qazaqstan men Indonezııa arasyndaǵy taýar aınalymy 700 mıllıon dollardan 400 mıllıon dollarǵa deıin tómendegen. Aradaǵy saýda qarqynyn qaıta jandandyrý joldary týraly Indonezııanyń Qazaqstandaǵy jáne Tájikstandaǵy elshisi Mohamad Fadjrýl Rahman aıtyp berdi.
Elshiniń aıtýynsha, 2022 jyly eki el arasyndaǵy taýar aınalymy 700 mıllıon dollardy qurasa, 2024 jyly – geosaıası ahýalǵa baılanysty 400 mıllıon dollarǵa deıin tómendegen.
– Qazirgi ýaqytta Qazaqstan, Reseı, Armenııa jáne Qyrǵyzstan kiretin Eýrazııalyq ekonomıkalyq odaq pen Indonezııa arasyndaǵy erkin saýda jónindegi memorandýmǵa qol qoıýdy kútip otyrmyz. Osylaısha, energetıka, munaı, gaz, tehnologııalar men tsıfrlandyrý salalaryndaǵy taýar aınalymyn arttyra alamyz, – dedi elshi Mohamad Fadjrýl Rahman Astanada «Ǵajaıyp Indonezııa» mádenı-dıplomatııalyq keshinde.
Qazirgi ýaqytta Qazaqstan men Indonezııa arasynda energııa, munaı, tsıfrlyq tehnologııalar salalarynda memorandýmdar, sondaı-aq ınvestıtsııalar jónindegi kelisimder bar. Oǵan Qazaqstan men Indonezııadaǵy ınvestorlardy qorǵaý tetikteri de kiredi.
– Ásirese Indonezııaǵa munaı qajet. Qazir Qazaqstan tarapynan “Qazmunaıgaz” ben Indonezııanyń “Pertamina” kompanııalary arasynda ınvestıtsııalyq joba tartý úshin kelissózder júrip jatyr. Sonymen birge, mıneraldar salasynda da yntymaqtastyq máseleleri qarastyrylýda. Indonezııanyń taý-ken salasyndaǵy iri holdıngi MIND ID Qazaqstandaǵy eń iri taý-ken kompanııasy – Eurasian Resources Group (ERG) kompanııasymen áriptestik ornatyp jatyr, – dep tolyqtyrdy Mohamad Fadjrýl Rahman.
Aıta keteıik, elordada Indonezııa Respýblıkasynyń Táýelsizdiginiń 80 jyldyǵyna arnalǵan «Ǵajaıyp Indonezııa» dıplomatııalyq-mádenı keshi ótti.
https://kaz.inform.kz/news/indoneziya-tauelszdgne-80-zhil-astanada-gazhayip-indoneziya-kesh-ott-56e0da/
Buǵan deıin dıplomat Indonezııanyń Qazaqstan azamattaryna vızasyz rejım engizetinin habarlaǵan edi.