Indonezııalyq ushaqtyń «qara jáshigindegi» málimetter alyndy
ASTANA. QazAqparat - Sarapshylar Indonezııanyń apatqa ushyraǵan Lion Air áýe kompanııasy ushaǵynyń «qara jáshiginen» málimetterdi aldy. Bul týraly Indonezııanyń Kóliktegi qaýipsizdikti qamtamasyz etý komıteti tóraǵasynyń orynbasary Nýrkaıo Ýtomo málim etti, dep jazady Anadoly agenttigi.
Agenttik taratqan málimetterge qaraǵanda, borttaǵy oqıǵalardy jazýǵa arnalǵan qurylǵy laınerdiń áýede bolǵan 69 saǵattaǵy áreketterin jazyp, saqtaǵan.
Vedomstvo ókili qazirgi tańda sarapshylar alynǵan aqparattardy zerttep jatqandyǵyn habarlady.
Al Indonezııanyń Tótenshe jaǵdaılarmen kúres agenttiginiń basshysy Mýhammed Sıýagı Indonezııa bıliginiń ekinshi «qara jáshik» pen áýe apatynyń qurbandaryn izdeý jumystaryn taǵy úsh kúnge sozǵandyǵyn habarlady.
Aıta keteıik, 29 qazanda Indonezııada Boeing 737 MAX 8 jolaýshylar ushaǵy apatqa ushyrady. Ushaq áýege kóterilgennen keıin 13 mınýttan soń jerge qulaǵan. Djakarta-Pankal-Pınang reısi boıynsha baǵyt alǵan laınerde 8 ekıpaj múshesi men 189 jolaýshy bolǵan.
Jolaýshylardyń arasynda Qazaqstan azamattary joq.
Osy oqıǵaǵa oraı Elbasy Nursultan Nazarbaev Indonezııa Prezıdentine kóńil aıtý jedelhatyn joldady.
Foto Anadoly agenttiginiń saıtynan alyndy
