Indonezııalyq ónertapqysh polıetılennen janarmaı óndiredi
ASTANA. QazAqparat - Álemdi alańdatqan ekologııalyq qaldyqtardan arylýdyń jolyn ındonezııalyq ónertapqysh usynyp otyr. Ol mototsıkline qajetti janarmaıdy ózi óndiredi, dep habarlaıdy 24.kz telearnasy.
Bul úshin munaıdyń qajeti joq, kádimgi jelge ushqan nemese qoqysta jatqan polıetılen qaldyqtary jetip jatyr. Hamıdı esimdi ónertapqysh kúnine 25 keli polıetılen qaldyǵyn qaıta óńdeıdi.
Jas jigit bolashaqta tek óziniń mototsıklin ǵana emes, búkil qala turǵyndarynyń kóligin osyndaı otynmen qamtamasyz etýdi josparlap otyr. «Bastapqyda men óz isimdi ashyp, jaı ǵana kásippen aınalysqym kelgen. Alaıda sońǵy ýaqytta qoqystyń qorshaǵan ortaǵa zııany týraly jıi oılana bastadym. Kúnderdiń kúninde maǵan tabys kózin paıdaly iske aınaldyrý oıy keldi», deıdi ónertapqysh Hamıdı.
Djakartada kúndelikti 6 myń tonna qoqys jınalady. Jergilikti kommýnaldyq mekeme ony shyǵaryp ta úlgermeıdi. Sondyqtan bılik bolashaqta bul iske sheteldik ınvestorlardy tartýǵa nıetti.
Al ázirge Djakarta basshylyǵy ekologııalyq jaǵdaıdy jaqsartý úshin sýpermarketterde polıetılen paketter úshin qosymsha aqy alady. Qazir Indonezııa teńizdi lastaıtyn elder qatarynda Qytaıdan keıin ekinshi orynda tur.
