Indonezııadaǵy jer silkinisinen Qazaqstan azamattary zardap shekken joq - SІM
ASTANA. QazAqparat - Indonezııadaǵy jer silkinisinen keıin qaza bolǵan nemese jaraqat alǵandardyń arasynda Qazaqstan azamattary joq. Bul týraly QazAqparat tilshisine QR SІM baspasóz qyzmetinen habarlady.
«Indonezııanyń tabıǵı apatpen kúres jónindegi agenttiginiń aldyn ala aqparatyna súıensek, jer silkinisi saldarynan qaza bolǵan nemese jaraqat alǵan Qazaqstan azamattary tirkelmedi. Olar bul jaıynda Qazaqstan konsýlyna tıisti málimetterdi usyndy. Búginde Indonezııa bıligimen únemi baılanysta otyrmyz. Eger de sol elden aqparat bolǵan jaǵdaıda, qosymsha habarlaımyz», - dedi QR Syrtqy ister mınıstrliginiń málimetinde.
Budan buryn habarlanǵandaı, ótken jeksenbi kúni ındonezııalyq Lombok aralynda qatty jer silkinisi tirkeldi. Apat saldarynan qaza tapqan adamdar sany 91-ge jetti.
Eýropalyq Jerorta teńizi seısmologııalyq ortalyǵynyń málimetinshe, Lombok aralynda 6,6 baldyq jer silkinisi bolǵan. Jerasty dúmpýiniń epıtsentri Mataram qalasynan (319 myń turǵyny bar) soltústik-shyǵysqa qaraı 49 shaqyrym jerde ornalasqan. Zilzala oshaǵy - 10 shaqyrym tereńdikte.
