Indonezııadaǵy jer silkinisinen qaza tapqandar 2 myńnan asty, shyǵyn - 911 mln dollar
ASTANA. QazAqparat - Indonezııanyń Sýlavesı aralynda bolǵan zilzala jáne odan týyndaǵan tsýnamı saldarynan kelgen jalpy zalal týraly aqparattar taraldy. Ekonomıkalyq zalaldyń kólemi 911 mln AQSh dollaryna jýyqtady, dep jazady The Jakarta Post gazeti dúısenbide eldiń Apattar saldaryn joıý jónindegi ulttyq agenttigine silteme jasap.
Agenttiktiń resmı ókili Sýtopo Nýgrohonyń aıtýynsha, bul - tek aldyn ala derekter, bul tsıfr áli ósýi múmkin. Apat saldarynan 68 myń úı qırap, 223 myń turǵyn baspanasyn tastap ketken, júzdegen medıtsınalyq, oqý jáne úkimet ǵımarattary úgitilip túsken.
Sońǵy derekterge qaraǵanda, zilzala jáne odan týyndaǵan tsýnamıden 2256 adam opat bolǵan, al zardap shekkender sany 10,6 myńnan asty. Qutqarýshylardyń aıtýynsha, ortalyq Palý qalasynyń mańyndaǵy eki eldi mekenniń ózinen 5 myń adam habar-osharsyz ketken. Al tabıǵı apat bolǵan aımaqta jalpy 4 mln adam tirshilik keship jatqan.
Eske sala keteıik, 28 qyrkúıekte Indonezııanyń Sýlavesı aralynda jer silkinip, artynsha tsýnamı bolǵan. Alǵashqy derekter boıynsha, apat saldarynan qaza tapqandar sany 30 adamnan kem emes degen aqparat taralǵan bolatyn.
