Indonezııadaǵy jer silkinisinen qaza tapqandar sany 47 adamǵa jetti
ASTANA. KAZINFORM — Indonezııanyń shyǵysynda bolǵan magnıtýdasy 7,7 baldyq kúshti jer silkinisinen keminde 47 adam qaza tapty, dep habarlaıdy Reuters.
Indonezııanyń Tabıǵı apattarǵa qarsy kúres ulttyq agenttiginiń málimetinshe, jer asty dúmpýleri turǵyn úılerdiń, mektepterdiń, medıtsınalyq mekemeler men memlekettik ǵımarattardyń qıraýyna ákelgen. 150-den astam úı zaqymdandy.
Flores aralyndaǵy Maýmere qalasynda 20 adam qaza tapty. Keıbir turǵyndardyń úıindi astynda qalǵany habarlandy.
Eń kóp zardap shekken aýdandarda izdeý-qutqarý jumystaryna kóshkinder, búlingen joldar jáne baılanystyń úzilýi kedergi keltirip otyr. Tabıǵı apat saldarynan keminde 2 myń adam úılerin tastap ketýge májbúr boldy.
Jer silkinisinen keıin bıiktigi bir metrden aspaıtyn shaǵyn tsýnamı tolqyndary tirkeldi. Bılik tsýnamı qaýpine baılanysty eskertý jarııalaǵanymen, shamamen úsh saǵattan keıin onyń kúshi joıyldy.
Zardap shekken aýdandarda izdeý-qutqarý jumystary jalǵasyp jatyr. Keıbir eldi mekenderge jetýdiń qıyndyǵyna baılanysty qıraý aýqymyn baǵalaý jumystary áli de júrgizilýde.
Eske salaıyq, Indonezııa jaǵalaýynda magnıtýdasy 7,7 baldyq jer silkinisi bolǵan edi.
