Indonezııadaǵy jer silkinisinen qaza tapqandar sany 20 adamǵa jetti

Maýmere qalasynyń izdeý-qutqarý basqarmasynyń qyzmetkeri Fathýr Rahmannyń BAQ-qa bergen málimetine qaraǵanda, jer silkinisinen 20 adam qaza taýyp, alty adam jaraqat alǵan. Taǵy eki adam úıindi astynda qalyp otyr.

Shyǵys Nýsa-Tengara provıntsııasynyń gýbernatory Melkı Laka Lena Kýpang qalasynda ótken baspasóz máslıhatynda jer silkinisi saldarynan birneshe ǵımarat pen turǵyn úıdiń zaqymdanǵanyn aıtty. Keıbir joldar kóshkin saldarynan jabylǵan nemese buǵattalǵan.

Onyń aıtýynsha, bılik ókilderi qıraý aýqymyn tolyq baǵalaý úshin derekter jınaýdy jalǵastyryp jatyr.

Áleýmettik jelilerde jarııalanǵan vıdeolardan ǵımarattardyń bir bóligi opyrylyp, úreılengen turǵyndardyń kóshege júgirip shyqqanyn kórýge bolady.

Jer silkinisinen keıin provıntsııaǵa qatynaıtyn birneshe reıs toqtatyldy.

Denpasardaǵy Qytaı Halyq Respýblıkasynyń Bas konsýldyǵy konsýldyq okrýginde júrgen Qytaı azamattaryn, ásirese Labýan-Badjodaǵy týrısterdi barynsha saq bolýǵa, jergilikti bıliktiń jer silkinisi men tabıǵı apattar týraly eskertýlerin baqylaýǵa úndedi. Sondaı-aq aftershoktar men tsýnamı qaýpine baılanysty saqtyq sharalaryn saqtap, jaǵalaý aımaqtarynan alys bolýǵa keńes berdi.

Jer silkinisi senbi kúni tańerteń erte bolǵan. Onyń oshaǵy Nagekeo aımaǵyndaǵy Mbaı qalasynyń mańynda ornalasqan. Keıin tsýnamı qaýpi jarııalanyp, ony keıinnen Meteorologııa, klımatologııa jáne geofızıka agenttigi joıdy.

Agenttik turǵyndardy yqtımal aftershoktarǵa baılanysty saq bolýǵa úndedi.

Qutqarý toptary zardap shekken aýdandardaǵy qurbandar sany men keltirilgen zalal kólemin anyqtaýdy jalǵastyryp jatyr.

Eske salaıyq, buǵan deıin Indonezııa jaǵalaýynda magnıtýdasy 7,7 bolatyn qýatty jer silkinisi tirkelgenin habarlaǵanbyz.