Indonezııadaǵy ıAva aralynda Semerý janartaýy oıana bastady

ASTANA. KAZINFORM — Indonezııanyń ıAva aralynyń shyǵys bóliginde ornalasqan Semerý janartaýy tún ishinde alty ret atqylady. Bul týraly Antara News agenttigi jazdy.

Agenttiktiń habarlaýynsha, Lýmadjang jáne Malang okrýgteriniń shekarasynda ornalasqan janartaý jergilikti ýaqyt boıynsha 00:26-dan 06:00-ge deıingi aralyqta kraterden 500 metrden 1200 metrge deıingi bıiktikke kúl baǵandaryn atqylaǵan.

Semerý janartaýyn baqylaý observatorııasynyń ókili Lıstvantonyń málimdeýinshe, Indonezııanyń ulttyq eskertý júıesine sáıkes janartaýdyń qazirgi qaýiptilik deńgeıi úshinshi deńgeı dep baǵalanǵan. Bul janartaýlyq belsendiliktiń artqanyn jáne halyq úshin birshama qaýip bar ekenin bildiredi.

Osyǵan baılanysty bılik qatań shekteýler engizdi: kraterden bes shaqyrym radıýstaǵy aýmaqta kez kelgen qyzmet túrine tolyq tyıym salyndy. Bul janartaýdan tas pen túrli výlkandyq jynystardyń laqtyrylý qaýpimen baılanysty. Sonymen qatar, turǵyndarǵa janartaýdan 13 kılometr radıýstaǵy aımaqta bolýdan jáne sharýashylyq qyzmet júrgizýden aýlaq bolý usynyldy.

Ásirese ózen arnalaryna jaqyn ornalasqan aımaqtarǵa erekshe nazar aýdarylyp otyr. 13 shaqyrymdyq aımaqtan tys jerlerde de adamdarǵa ózenderden keminde 500 metr qashyqtyqta júrý qatań túrde eskertildi. Sebebi lavalyq kóshkinder men janartaýlyq sel tasqyndarynyń (laharlardyń) 17 shaqyrymǵa deıin jetý qaýpi bar.

Semerý janartaýy Bromo–Tenger–Semerý ulttyq parkiniń quramyna kiredi jáne ıAva aralyndaǵy eń belsendi janartaýlardyń biri sanalady.

Eske sala ketsek, buǵan deıin Irandaǵy Taftan janartaýy 700 myń jyldan keıin «uıqydan oıanyp» kele jatqanyn jazdyq.