Indonezııadaǵy sý tasqynynan mert bolǵandar sany 500-den asty

ASTANA. KAZINFORM – Ótken aptada Indonezııany basqan sý tasqyny saldarynan mert bolǵandar sany 500-den asty. Qutqarýshylar zardap shekken aýdandarǵa jetýge umtylyp-aq jatyr, dep habarlaıdy BBC.

Úkimettiń Tótenshe jaǵdaılar agenttiginiń málimetterine qaraǵanda, Malaks buǵazynda qalyptasqan sırek kezdesetin tsıklon saldarynan paıda bolǵan sý tasqyny 1,4 mln adam turatyn úsh provıntsııaǵa zardabyn tıgizdi. 500 adam iz-túzsiz ketkenderdiń qatarynda, myńdaǵan adam jaraqat aldy.

Tropıkalyq daýyl saldarynan kúsheıe túsken mýssondar Ońtústik-Shyǵys Azııada keıingi kezde bolǵan eń kúshti sý tasqyndarynyń birin týyndatty. Malaızııa men Taılandta júzdegen adam mert bolyp, óńir boıynsha mıllıondaǵan adam zardap shekti. Taılandta resmı mert bolǵandar sany 170 adamǵa jetti, taǵy eki adam Malaızııanyń soltústigindegi Perlıs shtatynda kóz jumdy.

Shrı-Lankada sý tasqyny men kóshkin týdyrǵan tabıǵattyń dúleı kúshiniń saldarynan 160 adam qurban boldy.

Óte sırek kezdesetin qýatty «Senıar» tsıklony Indonezııada aýqymdy kóshkin men sý tasqynynyń týyndaýyna sebep boldy. Saldarynan kóptegen úılerdi sý shaıyp, myńdaǵan ǵımarat qulady.

-Tasqyn óte jyldam boldy, sanaýly mınýttarda sý kóshelerge jaıylyp, úılerdi basyp ketti,-dedi Indonezııa provıntsııasynyń turǵyny Acheh Arını Amalııa.

Ondaǵan adamnyń qutqarylǵanyna qaramastan qolaısyz aýa raıy qutqarý operatsııalaryn qıyndatyp jiberdi, júzdegen adam áli de qaýipti aımaqta otyr, dep habarlady Indonezııanyń tótenshe jaǵdaılar agenttigi.

Osyǵan deıin Indonezııada sý tasqynynan 442 adam qaıtys bolǵany týraly jazdyq.